Chortoqda elektr hisoblagichni o‘zboshimchalik bilan o‘zgartirgan tadbirkorga nisbatan jinoyat ishi qo‘zg‘atildi
Majburiy ijro byurosining Chortoq tumani bo‘limi tezkor sho‘basi xodimlari tomonidan 2020-yilning 28-fevral kuni o‘tkazilgan tadbir davomida xususiy korxona rahbari U.S. korxona nomiga rasmiylashtirilgan elektr hisoblagichni noqonuniy ravishda o‘zgartirgani aniqlandi. Bu haqda “Daryo”ga Majburiy ijro byurosi ma’lum qildi.
Xabar berilishicha, tadbirkorga qarashli umumiy ovqatlanish shoxobchasida o‘tkazilgan tezkor tadbirda belgilangan talablarga zid ravishda korxona nomiga rasmiylashtirilgan elektr hisoblagich o‘zboshimchalik bilan boshqa hisoblagichga almashtirilib, undan foydalanib kelinganligi aniqlangan.
Ma’lum bo‘lishicha, U.S. korxona nomiga rasmiylashtirilgan elektr hisoblagichni o‘zboshimchalik bilan boshqa hisoblagichga almashtirib, undan foydalangani natijasida ta’minotchi korxona manfaatlariga 59,2 million so‘m miqdorida zarar yetkazilgan.
Mazkur holat bo‘yicha korxona rahbariga nisbatan O‘zbekiston Respublikasi Jinoyat kodeksining 185-2-moddasi 2-qismi (Elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishi qo‘zg‘atildi.
Avvalroq Sirdaryoda elektr energiyasidan noqonuniy foydalanib, baliqchilik bilan shug‘ullangan baliqchilik xo‘jaligi ish yurituvchisi elektr tarmoqlari korxonasi manfaatlariga 120 million so‘m miqdorida zarar yetkazganligi aniqlangandi.
