«Саждада ўлишни хоҳлардим». Шерзод Бин қандай ўлимни орзу қилиши ҳақида гапирди

АҚШнинг Пенсилвания штатида яшаётган ўзбекистонлик актёр ва пародист Шерзод Бин журналист Жасур Ҳамроев билан суҳбатда қандай тоифадаги инсонларга ачиниши, қандай инсонларни яхши деб билиши ва қандай ўлимни орзу қилиши ҳақида гапирди.

«Оллоҳни инкор этадиган, ҳақорат қиладиган, Оллоҳ ва Расулоллоҳ (с.а.в)га нисбатан ёмон фикрда бўлган инсонлардан нафратланаман. Улардан нафақат нафратланаман, балки ачинаман ҳам. Бундай инсонлар ижтимоий тармоқларда ҳам кўпайиб қолди. Уларга Худо тавфиқ беришини тилайман. Улар кўтаролмайди Худонинг жазосини, қиёматда ҳеч биримиз кўтара олмаймиз», — дейди Шерзод Бин.

«Дўстнинг садоқатига, иймонига қараб чин дўст деб айта оламан. Яхши инсон авваламбор Худо билан яхши бўлади. Яхши инсоннинг яхшилигини қаердан билса бўлади? Намоз ўқиган инсонни мен яхши инсон деб биламан», — дея фикрларини давом эттиради актёр.

«Қандай ўлимни орзу қиласиз?» деган саволга эса Шерзод Бин «Саждада ўлишни хоҳлардим», дея жавоб берди.

Шерзод Бин 20 дан ортиқ фильмда ва 20 га яқин клипда суратга тушган. Бироқ ушбу клип ва фильмлардаги образларининг биронтасини ижодидаги энг яхши роль деб айта олмайди.

«Бир иш қилсангиз, у фақат сизнинг нафсингизга хизмат қилса, яхши эмас экан. Агар у охиратингизга ҳам хизмат қилса, яхши экан. Нафсим жиҳатидан айтишим мумкинки, ўйнаган ролларим орасида одамларга тўғри манфаат берадигани йўқ», — дейди Шерзод Бин.

Актёр Instagram’да турли мазмундаги видеоларни суратга олиб, тарқатаётган, турли расмлар жойлаштираётганларга мурожаат қилди.

«Биз Бухорий, Амир Темурнинг авлодиданмиз, деб телевизорда кўп гапирилади. Лекин фарзандлар тарбиясига эътибор қаратмаяпмиз. Қиёматда савол-жавоб фарзандга қўйилган исмидан бошланади. Бу қилаётган амалларинглар билан сизлар ота-онангизни савол-жавобда қийнаб қўясизлар, шуни айтмоқчиман. Камера қўйиб қўйишади, ҳар хил уятли қилиқлар қилишади. Турли кулгули роликлар қиладиган ака-укаларимиз кўпайиб кетди. Акалар, бу яхшимас. Ҳар бир ишда мантиқ бўлиши керак. Агар бу иш сизга фақат моддий томондан фойда келтириб, руҳий томондан сизга тарбия бера олмаётган бўлса, у ишингизни йиғиштирганингиз маъқул.

Шунчаки, сизларга шу йўлларни босиб ўтган инсон сифатида айтяпман. Мен сизлар қилган ишнинг, балки, кўпроғини ҳам қилганман, бундан афсусланаман. Шунинг учун сизлар ҳам афсусланманглар. Оллоҳ ҳаммамизга яхшиликларни берсин», — дейди Шерзод Бин.