Испанияда коронавирус тарқалишига сабабчи бўлган энг биринчи беморнинг йўқлиги ва касалликнинг февраль ойидаёқ мамлакатга кириш хавфи бўлгани аниқланди. Бу ҳақда Мадриддаги Карлос III саломатлик институти олимлари маълум қилди, деб ёзмоқда El Pais.
Испаниялик олимлар SARS-CoV-2 геномларини ўрганиб, унда уч гуруҳга мансуб вируслар: S, G ва V борлиги — улар Испанияда тарқалганини аниқлаган. Ирсият бўйича маълумотлар S гуруҳига мансуб вирус Испанияда февраль бошида пайдо бўлганини, у Валенсияда олинган таҳлилларда учрашини кўрсатган. Бундан ташқари, Мадриддаги ҳолатларнинг қарийб ярмида G гуруҳига мансуб вирусни юқтириш ҳолатлари учраган.
Вирусолог Хосе Алькамининг сўзларига кўра, вируснинг мамлакатда бу қадар кенг миқёсда тарқалгани энг биринчи инфекция ташувчининг ким бўлганини аниқлашда қийинчиликлар туғдиради.
Жонс Ҳопкинс университети берган маълумотларга кўра Испания янги турдаги коронавирус инфекциясини юқтириб олганлар сони бўйича кучли учликда бормоқда.
Март ойи охирида Испанияда COVID-19’дан вафот этганлар сони 3,4 мингдан ошган, касалликнинг асосий ўчоғи Хитойда шу вақтда 3281 киши коронавирусда ўлгани маълум қилинганди. Апрель бошида Испания касалланганлар сони бўйича Италиядан ўзиб кетди.
24 апрель ҳолатига кўра Испанияда мамлакат Соғлиқни сақлаш вазирлиги берган маълумотга мувофиқ эпидемия бошланганидан бери жами 219 764 нафар фуқарода коронавирус инфекцияси аниқланган. Касалликдан тузалганларнинг умумий сони 92 355 нафарни, инфекциядан вафот этганлар эса 22 524 нафарни ташкил қилган.
Изоҳ (0)