Кеча ва бугун: Карантин вақтида ҳувуллаб қолган Бухоро (фото+видео)

Бухоролик видеоблогер Абдулла Ражабов «Дарё» нашри учун махсус ролик тайёрлади. Унда сайёҳлар қадами узилмайдиган Бухоро шаҳри кўчаларининг олдинги ва карантин пайтидаги ҳолати тасвирланган.

Видеороликда «Арк» қўрғони, «Болоҳовуз» масжиди, «Нодирдевонбеги» ҳамда «Абдулазизхон» мадрасаси, Минорайи калон, қўшмадраса, Бухоро сув минораси, «Хўжа Насриддин» боғи, Шаҳристон гилам ва тилла буюм расталари, Абу Али ибн Сино фавворалар майдони, марказий кўчалар ҳамда ундаги замонавий кўп қаватли уйлар ва биноларнинг кеча ва бугуни таққосланган.

Маълумки, Бухоро туризм шаҳри ҳисобланади. 600 дан ортиқ маданий-меъморий обидаларга эга шаҳарда 263 минг 223 нафар аҳоли истиқомат қилади.

2019 йили шаҳарга 3 миллион 600 минг нафар сайёҳ ташриф буюрган бўлса, уларнинг 603 минг нафари хорижлик сайёҳлар бўлган.

Таъкидланишича, 2018 йил шаҳарга 289 минг хорижлик сайёҳ келган. Демакки, сайёҳлар оқими 2019 йилда икки бараварга ортган.

Бухоро вилоят Туризмни ривожлантириш департаменти ахборот хизматига кўра, 2020 йилда Бухорога маҳаллий ва хорижий сайёҳлар сонини 4,2 миллионга етказиш режалаштирилган. Меҳмонхоналар сонини эса 422 тага етказиб, бир кунда 10 613 нафар меҳмонни қабул қилиш имкониятини яратиш ҳаракати бошланган.

Бироқ дунёни ташвишга солаётган коронавирус туризм ривожига ҳам ўз таъсирини ўтказди.