Россия—Қозоғистон чегарасида юк машинасида кетаётган 2 ўзбекистонликда коронавирус аниқланди, деб хабар бермоқда «Хабар24». Улар Ғарбий Қозоғистондаги Сирим чегара постидан ўтиб кетмоқчи бўлган.

Фото: «Хабар.24»

Ҳар икковининг тана ҳарорати юқори эканлиги қайд этилган. Ҳайдовчилар госпиталга олиб кетилиб, COVID-19 учун таҳлил олинган ва унинг натижалари ижобий чиққан.

Azattyq Rýhy’нинг Қозоғистон президенти ҳузуридаги фавқулодда ҳолатни таъминлаш бўйича давлат комиссиясининг тезкор штабига таяниб хабар беришича, улар 25 ва 27 ёшли фуқаролар бўлиб, юк ташиш билан шуғулланиб келган. Айни пайтда улар вилоят юқумли касалликлар шифохонасига ўтказилган бўлиб, соғлиғи қониқарли аҳволда.

Қайд этилишича, Сирим чегара постидан ҳар куни 300 та автомобиль ўтади. Ушбу ҳудуддаги дастлабки икки ҳолат 29 март куни аниқланган.

«Улар ҳеч ким билан алоқада бўлмаган. Биринчиси бизнинг эпидемиологлар бўлди, лекин улар бутунлай ҳимоя кийимлари, ниқоб, тиббий қўлқопларда эди. Умумий ҳисобда бизда 4 та ҳолат аниқланди, охирги икки ҳолатни олсак, четдан келган ҳисобланади», — дейди Ғарбий Қозоғистон вилояти Товарлар ва хизматлар сифати ва хавфсизлигини назорат қилиш департаменти раҳбари Муҳамгали Ариспаев.

Айни пайтда Қозоғистонда коронавирус билан касалланганлар сони 802 кишига, қурбонлар сони эса 9 кишига етди. Ўзбекистонда эса коронавирусга чалинганлар сони 624 кишини ташкил қилмоқда.