Bloodhound Land Speed Record лойиҳаси муаллифлари ер устидаги тезликнинг рекордини янгилашга қарор қилиб, ўзларининг ракетомобилини виртуаль рақиблар билан «куч синаштирди», деб хабар беради «Zr.ru».
Bloodhound LSR учта виртуаль рақибга қарши пойга ўйнаган: оддий автомобиль, Formula-1 болиди ва Bugatti Chiron гиперкари.
Жанубий Африка саҳролари тасвирланган видеосимуляциядан кўриш мумкинки, Bloodhound LSR старт йўлагида оддий машинага ютқазиб қўйган, бироқ 18 сония ўтиши билан реактив тяга ўз кучини кўрсатган. Бу вақт ичида Bugatti Chiron ўзининг максимал тезлигига (420 км/соат) чиқиб олган.
Соатига 450 км/соат тезлик билан гиперкардан ўтиб кетган ракетомобил бир онда Formula-1 машинасининг ёнидан учиб ўтган. Пойга давомида Bloodhound LSR’нинг тезлиги 1010 км/соатга қадар етган — ракетамобиль ўтган йили ўтказилган реал синовларда худди шундай тезликка эришган.
Bloodhound Land Speed Record лойиҳаси муаллифлари иккита реал пойгани режалаштирмоқда — дастлаб автомобилни соатига 800 мил/соат (1287,48 км/соат), шундан сўнг 1000 мил/соат (1608,34 км/соат) тезликка чиқариш. Бироқ лойиҳа қийин даврларни бошидан ўтказмоқда: март ойининг бошида машинани такомиллаштириш учун маблағлар етмаётгани маълум бўлганди, коронавирус пандемияси сабаб эса лойиҳа бутунлай тўхтаб қолди.