“Technovation Girls” дастури ментори ва киберхавфсизлик бўйича лойиҳа менежери Дарья Цой ўз тажрибаси билан ўртоқлашар экан, IT соҳасида хотин-қизлар лойиҳаларини қўллаб-қувватлашнинг муҳимлиги ҳақида гапирди.
IT соҳасида ишлаш нафақат код ва техник кўникмалар, балки илҳом ва қўллаб-қувватлаш билан боғлиқ. Халқаро технология компанияларидан бирида лойиҳалар устида ишлаётган Дарья Цой бунга амин ва эндиликда у тажрибали мутахассис сифатида қизларга ўз лойиҳаларини амалга оширишда ёрдам беради ҳамда соҳани ўзгартиришга ҳисса қўшади.
Technovation Girls лойиҳасидаги ролингизни қандай таърифлаган бўлардингиз?
Фарғоналик жамоалар мураббийи сифатида фаолиятимда иккинчи йил. Мен учун, биринчи навбатда, бу шахсий воқеа. Оддий давлат мактаби битирувчиси сифатида, оддий ўқитувчилар оиласидан бўлиб, мен IT соҳасида ўз карьерамни ривожлантирдим ва энди мен туғилган шаҳримдаги қизларга бу йўналишда ёрдам беришни ва қўллаб-қувватлашни хоҳлайман. Мураббийликдан ташқари, мен ўз шахсий намунам билан жамоани IT соҳасида карьерани бошлашга илҳомлантира олишимга умид қиламан.
Сизнингча, IT соҳасида лойиҳаларни ишлаб чиқмоқчи бўлган қизлар учун қайси кўникма ва билимлар муҳимроқ?
Менимча, бунда асосий омил қизиқувчанлик ҳисобланади, шунинг натижасида қизлар бу лойиҳага қўшилиб, охиригача боришади. Жамоада ишлаш қобилияти ва масъулият ҳисси ҳам муҳимдир, чунки бошқа иштирокчилар билан алоқа ўрнатиш ва ўз вазифаларини бажариш лойиҳани муваффақиятли якунлаш учун бўлади.
Шундай лойиҳалар ҳақида гапириб берсангиз. Уларни амалга оширишда қандай қийинчиликлар бўлди ва буни қандай енгишди ?
Фарғонанинг LEN жамоаси билан ишлаяпман . Иштирокчилар қўшимча таълим марказларини қидириш учун илова ишлаб чиқмоқдалар, унда сиз офлайн дарсларда қатнашиб билим олишингиз ва шахсий сўровномалар асосида энг қулай вариантларни танлашингиз мумкин.
Менимча, биринчи қийинчилик лойиҳанинг етакчи ғояси ҳақида қарор қабул қилиш бўлди . Қизлар жуда кўп ғояларга эга эдилар ва жамоа биргаликда нималар қила олишини аниқлашлари керак эди.
Биз қизларнинг нималарга энг катта эҳтиёжи борлигини ва уларга қандай илова етишмаётганини аниқлаш учун бир нечта учрашувларда муҳокама қилдик. Ишонамизки, агар катта қизиқиш бўлсагина, яхши маҳсулотларни яратиш мумкин.
Касбий фаолиятингизни қандай бошлагансиз ва ҳозир нималар устида иш олиб боряпсиз?
Олий Иқтисодиёт мактаби менга нимага қизиқаётганимни ва келажакда ўзимни қаерда кўришимни тушунишда ёрдам берди. Курсдошларим ва мен Technovation Girls’га ўхшаш турли лойиҳаларда қатнашдик, йирик компаниялар ходимлари билан учрашдик ва уларнинг офисларига экскурсияларга бордик.
Турли соҳаларни ўрганиш туфайли, магистрлик дастурида мен IT соҳасида ривожланишни хоҳлаётганимни англадим. Бир вақтлар мен бир нечта банкларда амалиёт ўтаганман ва IT консалтингида ўз ўрнимни топишга ҳаракат қилганман.
2018 йилда мен Yandex Таxi ривожлантириш жамоасига кичик менежер сифатида қўшилдим ва йиллар давомида ўз вақтида ва олдиндан режалаштирилган натижаларга эришиш учун гуруҳларни мувофиқлаштириб, лойиҳа офисининг раҳбарига айландим.
Турли лойиҳалар орасида фойдаланувчиларга қулайлик яратиш мақсадида бир нечта хизматлар бирлаштирилган илова Супер Аппъни яратишда ҳам иштирок этдим. Бу кўплаб иштирокчиларни қамраб олган йирик лойиҳа эди ва мен жамоага ўз ҳиссамни қўшганимдан хурсандман.
Биз ҳозирда фойдаланувчи ва ҳамкорларимизнинг шахсий маълумотларини ҳимоя қилишга эътибор қаратмоқдамиз. Компаниямиз маҳаллий қонунчилик ва халқаро стандартларга, шунингдек, энг яхши глобал стандартлар, масалан – умумий маълумотларни ҳимоя қилиш тўғрисидаги регламентга (GDPР) риоя қилган ҳолда бу соҳага эътибор қаратяпмиз. Демак, махфий маълумотлар сизиб чиқиш ва нотўғри фойдаланишдан ҳимояланган.
Биз фойдаланувчи маълумотларининг хавфсизлигини таъминлаш ва фирибгарларнинг бизнинг инфратузилмамизга киришига йўл қўймаслик учун турли воситалар ва жараёнларни ишлаб чиқамиз. Менинг вазифам шундай лойиҳаларни мувофиқлаштириш ва бу борада ўз мақсадимга эришишдир.
Сизнинг IT соҳасидаги тажрибангиз менторликка бўлган ёндашувингизга қандай таъсир қилади? Бир-бирига ўхшаш принциплар ёки усуллар борми?
Ҳа, албатта бор. Менимча, иш фаолиятида IT-лойиҳаларни бошқариш ва Technovation Girls’да менторлик бир-бирига ўхшаш. Менежернинг ҳам, мураббийнинг ҳам асосий вазифаси мавжуд ресурслар асосида жамоани тўғри йўналтириш, лойиҳани ўз вақтида бажариш учун шароит яратишдир.
Бу соҳадаги аёлларнинг қандай ютуқлари сизни илҳомлантиради?
Биринчидан, булар мен шахсан биладиган ва ўз мақсадига эришиш учун нималарни бошдан кечириш мумкинлиги ҳақида тасаввурга эга бўлган одамлардир.
Мисол учун, менинг ҳамкасбларим орасида кичик шаҳарларда туғилган ва бизнинг соҳамизга мутлақо алоқаси бўлмаган университетларни, масалан, геология ёки иқтисод каби соҳаларда тугатган ишлаб чиқувчилар ва менежерлар бор.
Улар бир вақтлар нолдан бошлаб IT-саноатига киришдилар ва энди Yandex’да йирик лойиҳаларни бошқаришади. Инсон чин дилдан бирор нарсани хоҳласа ва унга ҳаракат қилса, ҳамма нарсага эришиши мумкинлигини исботлайдиган қизларга қойил қоламан .
Сизнингча, аёлларни IT соҳасига қандай жалб қилиш мумкин?
Мамлакатнинг турли ҳудудларида Technovation Girls каби лойиҳаларнинг ишга туширилиши ва IT соҳасида ишлаётган аёллар билан шахсан мулоқот қилиш имконияти сизга соҳани яхшироқ ўрганишга, ўзингиз учун келажагингизни ўйлаб кўришга ва ўқиш ва ривожланишда онгли равишда танлов қилишга ёрдам беради.
Technovation Girls’да иштирок этган қизларда қандай ўзгаришлар ёки муваффақиятларни сезасиз?
Мен билан ишлайдиган жамоа аъзоларининг улар учун янги соҳани ўрганишлари, ҳамма нарсани тезда ўзлаштиришлари мени ҳайратда қолдирди! Улар кўп нарсани билишади ва уддалай олишади, улар ҳар хил воситалар ёрдамида қунт билан ишлашади. Мисол учун, улар яқинда ўз жамоалари ҳақида видео сценарий ёзишга қарор қилишди ва битта учрашувда ҳамма нарсани мукаммал режа қилишди, мени уларнинг ташаббуси ва ривожланиш истаклари ҳайратлантиради.
Дастурни тугатгандан кейин сиз ва иштирокчиларнинг яна қандай режалари бор?
Биз чиндан ҳам лойиҳани ривожлантиришни давом эттириш истагидамиз, чунки биз ўз тажрибамиздан келиб чиқиб маълумот ва қўшимча таълим учун имкониятлар етишмаслигини биламиз. Бизнинг бу борадаги таклифимиз Фарғонадаги мактаб ўқувчиларига ёрдам беради, деб ўйлаймиз.
Сизнингча, қизларнинг IT соҳасида ривожланиши учун кейинги энг муҳим қадам нима?
Лойиҳани тугатган қизлар келажакда нима билан шуғулланишлари ҳақида қарор қилаётганда, мен уларга университетдаги тегишли йўналишни танлашни, қўшимча таълимга эътибор беришни ва университетдан ташқарида ҳам ўз лойиҳаларини яратишни тавсия қиламан.
Кўп миллионли маҳсулотлар қандай яратилганлигини кўриш, буни ўрганиш ва кейин тўпланган билимларни шахсий ёки корпоратив лойиҳаларда қўллаш учун йирик компанияларда амалиёт ўташ муҳимдир.
Шериклик ҳуқуқи асосида.
Изоҳ (0)