Марказий ҳарбий округ қўмондони кўрсатмасига асосан 2 апрель куни Самарқанд вилоятида жойлашган карантиндаги фуқаролар хавфсизлигини таъминлаш учун тантанали равишда навбатдаги жанговар смена юборилди. Бу ҳақда ҳарбий журналист Ғайрат Мадраҳимов «Дарё»га маълум қилди.
Тадбирда округ қўмондонлиги, Самарқанд, Жиззах ҳамда Навоий гарнизони офицерлари, ҳарбий қисм командирлари, ҳарбий хизматчилар иштирок этди.
Дастлаб, карантиндаги фуқароларнинг хавфсизлигини таъминлашда ва кўчалар, аҳоли уйларини дизинфекция қилишда, шунингдек, уруш қатнашчилари, ёлғиз кексалар холидан хабар олишда фаоллик кўрсатган бир гуруҳ ҳарбий хизматчиларга пул, эсдалик совғалари ҳамда навбатдаги унвонлар топширилди.
Шундан сўнг, Самарқанд вилоятида карантинга олинган шифохона ва биноларда фуқароларни хавфсизлигини таъминлашга жалб қилинган бўлинмаларга жанговар топшириқ берилди.
Округ қўшинлари қўмондони, полковник Ойбек Саидовнинг қайд этишича, карантин масканида хизматни ўташ жанговар вазифани бажариш билан тенглаштирилади. Самарқанд вилоятида 5 та, Жиззах вилоятида 1 та ҳамда Навоий вилоятида 4 та, жами 10 та объектда 200 нафарга яқин ҳарбий хизматчи томонидан патруллик қўриқлови олиб борилмоқда.
Бундан ташқари, ички блокпостларда ҳам хизмат ташкил этилган. Карантин ҳудудида қўриқловни амалга оширган бўлинмалар эса Самарқанд ҳарбий госпиталига 14 кунлик карантинга жойлаштирилади.
Аввалроқ, Марказий ҳарбий округ бўлинмаси Қозоғистондан келган ўзбекистонликларнинг карантиндаги хавфсизлигини таъминлаши, округда ҳарбий хизматни ўтаб бўлган аскарлар махсус рейс билан ўз уйларига кузатилгани ҳақида хабар берилган эди.
Изоҳ (0)