Вазирлар Маҳкамаси ҳузуридаги Санитария-эпидемиология назорати давлат инспекцияси бошлиғи Нурмат Отабеков «Ўзбекистон 24» телеканали орқали қилган чиқишида иш юзасидан одамлар билан мулоқот қилишга мажбур бўлаётган фуқароларни эҳтиёткорликка, касалликнинг клиник белгиларини сезган заҳоти шифокорларга мурожаат қилишга чақирди.
Вазият мураккаблашиб бораётганини ҳали тўлиқ англаб етмадик, чамаси. Ҳанузгача карантин тадбирларига риоя қилмаслик, мантиқсиз, мақсадсиз кўчаларда кезиб юриш, тиббиёт ходимларининг тавсияларига амал қилмаслик ҳолатлари учраб турибди.Маълумот учун, 3 апрель Тошкент вақти билан соат 9:00 ҳолатига кўра Ўзбекистонда коронавирусга чалинган жами беморлар сони 221 нафарга етди — улардан 25 нафари соғайиб, реабилитацияга ўтказилган, икки нафари эса вафот этган.Аҳамият берсангиз, ҳозирги кунда оммавий ахборот воситаларининг барчаси фақат коронавирус билан шуғулланяпти холос. Тиббиёт ходимлари бир ёқда турсин, бошқа барча соҳа ходимлари коронавирус касаллиги бўйича, унинг профилактикаси бўйича нима иш қилишимиз кераклиги ҳақида қайта-қайта гапиряпти.
Назаримда, бу каби тарғиботдан кейин касалликнинг клиник белгилари, ундан ҳимояланиш усуллари ёд бўлиб кетиши керак эди. Минг афсуски, ҳанузгача касаллик клиник белгилари кузатилса, бунга бепарволик билан қараб, тиббиёт ходимларига мурожаат қилмасдан узоқ муддат уйда қолиб кетиб, аҳволи оғирлашганидан кейин шифохонага мурожаат қилаётганлар бор.
Ҳали ҳам кеч эмас. Кўзимизни очишимиз керак. Айниқса, иш юзасидан одамлар билан мулоқот қилишга мажбур бўлаётган тиббиёт ходимлари, ички ишлар ходимлари, Миллий гвардия ходимлари, қўйингки, мана шу жараёнга жалб этилган оммавий ахборот воситалари ходимлари қачонки мулоқотга киришишга мажбур бўлган пайтда ўз эҳтиётимизни қилишимиз керак.
Нурмат Отабеков, Вазирлар Маҳкамаси ҳузуридаги Санитария-эпидемиология назорати давлат инспекцияси бошлиғи
Изоҳ (0)