Ўзбекистонда коронавирус ташхиси қўйилган беморларнинг яна ўнга яқини тўлиқ тузалиб, уларга жавоб берилиши кутилмоқда. Бу ҳақда Вирусология илмий текшириш институти клиникаси бош шифокори, тиббиёт фанлари доктори Муҳайё Асилова ССВ жамоатчилик билан алоқалар бўлими томонидан уюштирилган видеомурожаатда маълум қилган.
Унда шифокорлар коронавирус инфекциясига қарши қандай кураш олиб бораётгани, инфекцияга чалинган беморларга қандай даволаш муолажалари кўрсатилаётгани, айни пайтда беморларнинг аҳволи қандайлиги ва яқин кунларда уларнинг қанчаси бутунлай соғайиб кетиши кутилаётгани баён этилган.
«Бугун биз беморларнинг ҳар бирини илмий, тиббий ва амалий томонлама яна бир бор текшириб чиқдик. Аввалроқ 8 киши кетганди, бугун яна 4 кишига жавоб берилди. Шу кунларда яна 10—11 кишини кузатишни режалаштиряпмиз. Чунки уларда клиник белгилар йўқ, деса ҳам бўлади. Улар яна текширилади ва касаллик чиқмаса, улар кетиши мумкин», — деган у.
Эслатиб ўтамиз, 1 апрель ҳолатига кўра, Ўзбекистонда коронавирусга чалинганлар сони 181 кишига етди. Жами 12 киши касалликдан тузалди, 2 киши вафот этди.
Изоҳ (0)