БМТ бош котиби Антониу Гутерриш коронавирусга қарши курашиш ва унинг иқтисодий оқибатларининг олдини олишда ривожланаётган давлатларга ёрдам бериш учун жаҳон ЯИМининг 10 фоизи миқдорида пул чоп этишни таклиф қилди. Бу ҳақда «ТАСС» хабар бермоқда.
Фото: Getty Images
«Бизга жаҳон ЯИМининг камида 10 фоизини ташкил этувчи умумий, мувофиқлашган жавоб керак. Ривожланган мамлакатлар буни қила олади ва айримлар уни амалга оширишни бошлади», — деган у.
Намуна сифатида АҚШ конгрессининг Америка иқтисодиётининг қарийб 10 фоизини ташкил этувчи 2 триллион доллар маблағ ажратиш тўғрисидаги қарорини кўрсатди.
«Глобал миқёсда ҳам худди шундай қилиш керак деб ҳисоблайман. Бу ривожланаётган мамлакатларнинг таҳдидларга муносиб тарзда жавоб қайтаришга имкон берувчи пул чоп этишимизни билдиради», — деб айтган ва бунинг учун глобал иқтисодий ечимлар кераклигини, одатдагидек ҳаракат қилиш иш бермаслигини таъкидлаган.
Аввалроқ ЖССТ коронавирус пандемиясининг тарқалиши тезлашганини маълум қилган эди. Халқаро валюта жамғармаси эса 2020 йилда жаҳон иқтисодиётини 2008 йилдагидан ҳам оғирроқ рецессия кутаётганини айтганди.
