Сўнгги ҳафта давомида коронавирус пандемияси сабаб, тиббиёт ресурсларида етишмовчилик кузатилаётгани сир эмас. Бундай оғир вазиятда кийим ишлаб чиқаришда мантиқ йўқлигини тушуниб етган мода олами вакиллари ҳимояловчи воситалар ҳамда антисептик геллар ишлаб чиқаришга киришди.
Chanel бренди ҳам француз соғлиқни сақлаш ташкилоти ишора бериши билан ҳимояловчи ниқоб ва халат ишлаб чиқаради, деб ёзади Elle. Бу ҳақида Chanel 29 март, якшанба куни, эълон қилган.
Reuters’нинг бренд маълумотига таяниб ёзишича, компаниянинг ишчи кучи ҳимояловчи ниқоб ва халатлар ишлаб чиқаришга сафарбар қилинган. Шунингдек, Chanel томонидан давлат шифохоналарини қўллаб-қувватлаш фавқулодда фондига 1,2 миллион евро ажратилган ҳамда компания ходимларига саккиз ҳафталик иш ҳақи ваъда қилинган.
Маълумот учун, 29 март ҳолатига кўра, Францияда коронавирус билан касалланганлар сони 40 минг кишини ташкил қилиб, 2600 киши вафот этган. Соғлиқни сақлаш вазири Оливье Веран, мамлакатда бир ҳафтада 40 миллион ниқоб ишлатилаётганини билдирган.
Изоҳ (0)