Кўйлаклар ҳар бир аёл гардеробининг ажралмас қисми. Улар аёлнинг гўзаллигини янада орттиради. Кўйлаклар билан турли нафис образлар яратиш мумкин.
Психологларнинг маълумотларига кўра, эркаклар кўйлак кийган аёлларни ёқтиради. Кўйлаклар ҳеч қачон модадан қолмайди. Қуйида баҳор-ёз мавсумида қандай кўйлаклар урфга кириши ҳақида сўз юритилади.
«Запахли» кўйлаклар. Бундай кўйлаклар узунми, калтами, ҳеч қачон урфдан қолмайди. Унинг энг муҳим афзаллиги бундай кўйлак тана тузилишидан қатъи назар ҳаммага ярашади. «Запахли» кўйлакларни учрашувга, сайр қилишга ёки ишга ҳам кийиб борса бўлади.
Қиммат матолардан тикилган кўйлаклар. Кўйлакнинг чиройли кўриниши унинг қанчалик сифатли ва қимматбаҳо матодан тикилганига ҳам боғлиқ. Кўйлак учун сотиб олаётган матодан пулингизни аяманг, шунда у сизга узоқ муддат хизмат қилади ҳамда устингизда чиройли кўринади.
Қора кўйлак. Таниқли дизайнерлардан бирининг «Ҳар бир аёлнинг гардеробида калта қора кўйлак бўлиши керак» деган гапи ҳозирга қадар ўзининг аҳамиятини йўқотмаган. Қора рангли кўйлакни исталган вазиятда кийса бўлади, у доим урфда бўлади. Уни ишга, сайрга, байрамга кияверасиз. Қора ранг эса сизни озғин қилиб ҳам кўрсатади.
Чарм. Чармдан тикилган кўйлаклар ушбу баҳор мавсумида урфга кирди. Бундай кўйлакларнинг тиззадан сал тушиб турадиган узунроқ вариантини танлаган маъқул. Кўйлак танлаётганда мато сифатига албатта эътибор беринг. Чарм кўйлак ҳар қандай тана тузилишидаги аёлга ярашади. Унинг ягона камчилиги кунлар исиб кетганидан кейин кия олмаслигингиз. Чарм кўйлаклар баҳор ва кузги салқин ҳавода айни муддао.
Ялтироқ матодан тикилган оқшом либослари. Бундай кўйлаклар ҳам ҳеч қачон урфдан қолмайди. Уларни танлашда тана тузилишига мосини харид қилиш керак.
Умуман олганда дид билан танланган ҳар қандай кўйлак аёлларга ярашади. Кўйлак танлаётганда у тананинг камчиликларини яшириб, кўркингизга кўрк қўшишига эътибор бериш зарур.
Изоҳ (0)