27 март куни соат 12:00 дан бошлаб, Навоий ва Зарафшон шаҳарлари, шунингдек, Учқудуқ, Томди, Конимех ва Хатирчи туманларига вилоятнинг барча ҳудудларидан кириш ва чиқиш ҳар қандай транспорт воситаларида (автобус, микроавтобус ва енгил автотранспорт) тўхтатилади. Бу ҳақда Навоий вилояти ҳокимлиги хабар берди.
Мазкур ҳудудларга кириш ва чиқишдаги чекловлар юк ташиш билан боғлиқ ҳолларга, шунингдек, шаҳар ва туманларда (Навоий, Зарафшон шаҳарлари, Учқудуқ, Томди, Конимех ва Хатирчи туманлари) доимий яшовчи (рўйхатдан ўтган) шахсларга, маҳаллий давлат ҳокимияти органлари, ҳуқуқ-тартибот идоралари, бошқарма, идора ва ташкилот (нодавлат ташкилот)ларда меҳнат (хизмат) фаолиятини амалга ошираётган раҳбар ва ходимлар, шифокор ва ҳамширалар, давлат санитария ва эпидемиологик осойишталик маркази ходимлари ҳамда вилоят ҳокимининг алоҳида топшириғига асосан вилоят туманларига бириктирилган масъул ходимларига нисбатан татбиқ этилмайди.
Шу билан бир қаторда, 27 март куни соат 12:00 бошлаб ушбу ҳудудларда автобуслар ҳаракати тўхтатилади.
«Вилоятнинг шаҳар ва туманлари ҳудудларига киришга қўйилган чекловлар ва карантин қоидаларини бузган шахсларга нисбатан қонунчиликда белгиланган тартибда чоралар кўрилиши ҳақида огоҳлантирамиз!», — дейилади хабарда.
Аввалроқ коронавирус сабаб Самарқанд ва Бухоро вилоятларига кириш ва чиқиш тўхтатилгани ҳақида хабар берилганди.
Эслатиб ўтамиз, 22 мартдан Тошкент шаҳри ҳудудида барча жамоат транспорти — автобус, метро ва йўналишли таксилар ҳаракати вақтинчалик тўхтатилган. 24 мартдан бошлаб Тошкент шаҳрини вилоятлар билан боғловчи постлар, Қамчиқ довони бўйлаб ҳаракатлар, 26 мартдан эса Наманган шаҳри кириш ва чиқиш тўхтатилган эди.
Изоҳ (0)