Коронавирус яширин даврда – касаллик белгилари чиқмаса ҳам юқиш омилига эга. Бу ҳақда Соғлиқни сақлаш вазирлиги ҳузуридаги Санитария-эпидемиологик осойишталик агентлиги директори Баҳром Алматов хитойлик ҳамкасблари берган маълумотларга таяниб, «Дарё» мухбирига берган қисқача интервьюсида айтиб ўтди.
Фото: «Дарё»
20 март куни пандемиянинг олдини олишга қаратилган халқаро видеоконференцияда бўлиб ўтган ва унда Соғлиқни сақлаш вазирлиги раҳбарияти ҳам иштирок этган. Баҳром Алматовнинг таъкидлашича, анжуманда хитойлик мутахассислар ўз тажрибаларини батафсил айтиб берган.
Вирус ҳақида бир нечта янгиликлар айтиб ўтилди. Масалан, вирусни яширин даврида – касаллик белгилари чиқмаса ҳам юқиш қобилиятига эга эканлиги амалиётда кузатилган. Шунингдек, вирус ташувчиларининг эпидемиологик аҳамияти юқори эканлигини айтиб ўтди. Вирусга қарши юқори таъсир кўрсатадиган препаратлар ҳақида ҳам ахборот берилди. Буларнинг барчасини амалиётга жорий этиш бўйича ишлар олиб бормоқдамиз.
Баҳром Алматов, Санитария-эпидемиологик осойишталик агентлиги директори
22 март ҳолатига кўра, Хоразм вилоятида коронвирусга чалинган шахс аниқланганидан сўнг Ўзбекистонда коронавирус инфекцияси билан касалланганлар сони 43 нафарга етгани маълум қилинган эди. Хоразмдаги беморда дастлабки текширув натижалари унинг коронавирусга чалинганини кўрсатган ҳамда у коронавирус беморлари рўйхатига киритилган. Такрорий текширувда, бошқа тест текшируви натижасида эса унда коронавирус тасдиқланмаган. Айни вақтда у карантинда сақланмоқда.
