O‘zbekistonda koronavirus infeksiyasi bilan kasallanganlar soni ayni paytgacha yana bittaga oshib, 43 nafarga yetdi. Bu haqda Sog‘liqni saqlash vazirligi xabar berdi.
Ma’lum qilinishicha, infeksiya aniqlangan 43-bemor Istanbulda bo‘lib qaytgan. Koronavirus infeksiyasi Toshkent shahridan tashqarida — Xorazm viloyatida qayd qilingan.
Avvalroq, Sog‘liqni saqlash vazirligi O‘zbekistonda koronavirus infeksiyasini yuqtirib olganlar soni 42 nafarga yetgani, og‘ir ahvoldagi bemorlar yo‘qligini ma’lum qilgandi.
21-mart kuni O‘zbekistonda koronavirusga chalinganlar soni 41 nafarga yetgani haqida xabar berilgandi. Ma’lum bo‘lishicha, koronavirus aniqlangan 42-bemor Shveysariyada bo‘lib qaytgan. Qo‘shimcha qilishlaricha, ayni vaqtda Virusologiya ilmiy-tekshirish institutida bo‘lib turgan 42 nafar bemorning 9 nafarida o‘pkaning yallig‘lanishi — pnevmoniya qayd qilingan. Og‘ir ahvoldagi bemorlar yo‘q.
Tuzatish: Sog‘liqni saqlash vazirligining ma’lum qilishicha, Xorazmdagi bemorda dastlabki tekshiruv natijalari uning koronavirusga chalinganini ko‘rsatgan, hamda u koronavirus bemorlari ro‘yxatiga kiritilgan. Takroriy tekshiruvda, boshqa test tekshiruvi natijasida esa unda koronavirus tasdiqlanmagan. Ayni vaqtda u karantinda saqlanmoqda.