Ўзбекистонда коронавирус сабабли зарар кўриши мумкин бўлган соҳаларда солиқ таътиллари берилиши режалаштирилмоқда

Коронавирус пандемиясининг бутун дунё мамлакатлари қатори Ўзбекистоннинг иқтисодиётига ҳам салбий таъсир кўрсатиши кутилмоқда. Мазкур таъсирларнинг салбий оқибатларини камайтириш мақсадида бир қатор ишлар режалаштирилмоқда. Бу ҳақда Ўзбекистон Президенти Шавкат Мирзиёев коронавирус билан боғлиқ вазият бўйича Ўзбекистон халқига қилган мурожаатида таъкидлаб ўтди.

Президентнинг маълум қилишича, сўнгги икки ҳафтада жаҳон бозорида нефтнинг нархи кескин пасайиб кетгани оқибатида, Ўзбекистоннинг газ экспортидан келадиган тушумлари қисқариши мумкин. Ўзбекистоннинг хориждаги асосий савдо ҳамкорларининг миллий валюталари қадрсизланиши республикага ҳам валюта тушумини камайтиради.

Шавкат Мирзиёевнинг қайд этишича, хорижий туристлар сони ва тушум миқдори камайиши мумкин. Булар, табиийки, ялпи ички маҳсулот ва экспорт ҳажмига таъсир қилмасдан қолмайди.

Президент топшириғига мувофиқ, Махсус ишчи гуруҳ туризм, транспорт, фармасевтика ва енгил саноат каби соҳаларга солиқ таътиллари бериш, кредитларни қайтариш муддатини кечиктириш, кечиктирилган ташқи қарздорлик учун жарима қўлламаслик тартибини жорий қилиш чораларини кўрмоқда.

Шунингдек, ҳукумат қийин аҳволга тушиши мумкин бўлган соҳа ва тармоқларни, йирик корхоналарни қўллаб-қувватлаш бўйича алоҳида чора-тадбирлар дастурини ишлаб чиқиб, амалга ошириши зарур. Бу жараёнда, аввало, молия ва хом ашё бозорида беқарорлик юзага келишига йўл қўймаслик лозим.

Бундан ташқари, молиявий барқарорликни сақлаш ҳамда бозорларда нарх-наво ўсишининг олдини олиш зарурлиги таъкидланди. Иқтисодиётнинг базавий ва ҳал қилувчи тармоқлари узлуксиз ишлашини сақлаб қолиш керак. Бунинг учун ҳар бир тармоқ, корхона ва ҳудуд кесимида манзилли ва аниқ тадбирларни амалга ошириш лозим бўлади.

Давлат раҳбари марказдан ҳудудий бюджетларни ва аҳолини қўллаб-қувватлаш асосий вазифа бўлиши шартлигини таъкидлади. Унинг қайд этишича, бутун халқ коронавирусга қарши кураш фаолияти ошкоралик тамойиллари асосида олиб борилаётганини аниқ билиши керак.

Шу мақсадда, жаҳон жамоатчилиги ҳамда аҳоли вазият бўйича вақтида хабардор этиб борилмоқда. Керакли чоралар янада кучайтирилади.

Ўзбекистонга коронавирус кириб келишидан олдин Вазирлар Маҳкамасида коронавируснинг туризмга таъсири муҳокама қилинган эди. Кейинроқ туроператорлар коронавирус туфайли Ўзбекистонда солиқ таътили эълон қилишни таклиф қилган. Мамлакатда коронавирус қайд этилгани сабабли ички саёҳатлар ва оммавий тадбирлар вақтинча тўхтатилди.

Шунингдек, Ўзбекистон Марказий банки тижорат банкларига кредит олган тадбиркорларга коронавирус сабаб имтиёз даври беришни тавсия қилди.

Шавкат Мирзиёев аввалроқ ҳам коронавируснинг иқтисодиётга таъсир қилиши мумкинлиги ҳақида гапирган эди.