16 март куни Сирдарё вилояти ҳокими Ғофуржон Мирзаев ва озиқ-овқат маҳсулотлари дўконларидаги нарх-наво билан танишиш мақсадида Гулистон шаҳридаги деҳқон бозорига келди, деб хабар берди «Сирдарё хабарлари» Telegram канали.

Telegram / «Сирдарё хабарлари»

«Бозорда одатдагидек жараён. Харидорлар оқими ҳам ҳар кунгидек. Бирон раста ёки савдо дўконида навбатда турганлар кўринмайди. Ун, ёғ, шакар ва бошқа кундалик эҳтиёжи ҳамда ҳаётий зарурати баланд бўлган маҳсулотлар сотилаётган дўконларда ҳам ана шундай ижобий ҳолат.

Вилоят раҳбари сотувчилар ва харидорлар билан суҳбатлашди. Мамлакатда озиқ-овқат маҳсулотлари ва бошқа кундалик эҳтиёж молларининг етарли захираси мавжудлиги, ҳеч қандай ваҳимага ўрин йўқлиги хусусида гапириб, савдо, санитария-гигиена қоидаларига қатъий риоя қилиш, айниқса нарх-навони сунъий ошириб юбормаслик бўйича тавсияларини берди.

Айтиш лозимки, мазкур янги бозор Гулистон шаҳрининг энг йирик савдо маркази ҳисобланади. Бу ердаги улгуржи савдодан нафақат деярли бутун Сирдарё, қолаверса қўшни вилоятларга ҳам турли маҳсулотлар тарқатилади. Яқинда фойдаланишга топширилган ‘Хумо’ савдо маркази ҳам бозор ҳудудида жойлашган.

Ушбу супермаркетнинг бунёд этилиши туфайли кўплаб иш ўринлари яратилиши билан бирга йирик замонавий савдо тизими ҳам яратилди. Бозор яқинидаги ‘Ўзбекистон’ кўчасининг қиёфаси эса тубдан янгиланмоқда. Икки четини 5—7 қаватли бинолар қуршаётган бу муҳташам йўл атрофида сўлим хиёбонлар ҳам ташкил қилинаётир. Вилоят ҳокими ушбу қурилиш-ободонлаштириш ишлари билан ҳам яқиндан танишди», — дейилади хабарда.

Telegram / «Сирдарё хабарлари»

Telegram / «Сирдарё хабарлари»

Telegram / «Сирдарё хабарлари»

Telegram / «Сирдарё хабарлари»

Telegram / «Сирдарё хабарлари»

Эслатиб ўтамиз, ҳозирда Ўзбекистонда коронавирусга чалинганлар сони олти нафарга етди. Вирусология илмий текшириш институти директори Эркин Мусабоевнинг айтишича, Ўзбекистонда коронавирусга чалингани аниқланган олти беморнинг аҳволи қониқарли.

Ўзбекистонда 15 март, якшанба куни, коронавирусга чалиниш билан боғлиқ илк ҳолат қайд этилган эди. Вирус 11 март куни Франциядан қайтган аёлда аниқланган эди. Кейинроқ, 16 мартга ўтар кечаси COVID-19 коронавирус касаллигини юқтирган фуқаролар сони яна уч нафарга кўпайгани маълум бўлди.

Улардан бири 15 март куни тонгда Истанбулдан қайтган эркак бўлса, қолган икки нафари биринчи бемор — 11 март куни Франциядан қайтган аёлнинг ўғли ва қизи экани маълум қилинган эди. Маълум қилишларича, айни пайтда ушбу фуқаронинг турмуш ўртоғи ва неварасида ҳам коронавирус инфекцияси қайд этилган.

Аввалроқ Бош вазир Абдулла Арипов томонидан коронавирусга қарши кураш чора-тадбирлари хусусида ўтказилган матбуот анжуманида карантин шароитида нархларни сунъий оширган «савдогарлар»га нисбатан жиноий жазо тайинланиши мумкинлиги маълум қилинди. Коронавирус профилактикаси доирасида Тошкент шаҳридаги бозорлар ёпилмайди.