Ғузор тумани ҳокими Саъдулла Бобоқулов телефонда судья билан бўлган мулоқотини изоҳлар экан, ҳокимларни қарғага ўхшатди. Ҳокимият ҳамда тумандаги ташкилотлар ўртасида ҳамкорлик тўхтаб қолганини таъкидлади.
Саъдулла Бобоқулов.
Фото: Қашқадарё вилояти ҳокимлиги
Ижтимоий тармоқларда тарқалган аудиоёзув ўзини Ғузор тумани ҳокими ёрдамчиси Ҳасан дея таништирган шахснинг Фуқаролик ишлари бўйича Ғузор туманлараро судининг раиси Саттор Ақановга қўнғироқ қилиб, ҳоким сўраётганини айтиши билан бошланади. Телефон гўшагини олган ҳоким суд раисининг салом бермаганига эътибор қаратиб, «Ёшингиз кичик, салом берсангиз бўлади-ку?!» дейди. Суд раиси эса «процессда эканини» айтар экан, нима учун қўнғироқ қилаётганини сўрайди.
Шунда ҳоким Бобоқулов «Ҳозир гаплашишга вақтингиз йўқми, қачон вақтингиз бўлади», дейди. Судья ҳокимга қабулига келиши мумкинлигини билдиради. Ҳоким, аксинча, судья унинг қабулига келиши лозимлигини талаб қилади. Бунга жавобан суд раиси «Сизнинг қабулингизга бормайман, кечириб қўясиз», дейди.
Мазкур воқеа хусусида «Дарё» мухбири билан суҳбатлашган Ғузор тумани ҳокими Саъдулла Бобоқулов суд раисини халқ депутатлари туман кенгаши сессиясига чақирмоқчи бўлиб қўнғироқ қилганини, суҳбат аввалида ўзини туман кенгаши раиси сифатида таништирганини айтмоқда.
«Суд раиси халқ депутатларининг туман кенгаши сессиясида иштирок этиб, депутатларга ҳисобот бериши лозим эди, шу сабабдан ҳам судьяга қўнғироқ қилиб, бу ҳақда билдирмоқчи бўлдик. Аммо эшитганингиздек, судья ҳурматсизлик қилди», — дейди Ғузор ҳокими.
Мавзуга доир: Ғузор тумани ҳокими сайловга тайёргарликда кўзбўямачиликка йўл қўйгани боис ҳайфсан олди
Ҳокимнинг таъкидлашича, мазкур воқеага 10-15 кун бўлган. Судьянинг овози ҳоким ёрдамчисининг телефонига ёзиб олинган.
«Судьялар олий кенгашига хат билан чиқиб, мазкур ҳолат ҳақида билдирдик, аммо 10-12 кун ўтяптики, жавоб йўқ», — дейди Саъдулла Бобоқулов.
Ғузор тумани ҳокимининг маълумот беришича, халқ депутатлари туман кенгаши судьяга ҳисобот бериши лозимлиги хусусида ёзма мурожаат ҳам қилган.
«Ҳокимларнинг обрўси тушиб кетяпти, айтганингни қилишмаяпти, туманни бошқаришга қийналяпмиз. Халқ таълими, мактабгача таълим, тиббиёт ва мана энди маҳаллалар ҳам бошқармаси, вазирлиги билан гаплашяпти. Ҳокимият уларнинг олдига борса, ‘мазангни қочираман’ деяпти. Шу сабабдан ҳам ҳокимият ва ташкилотлар ўртасидаги алоқа узилиб қолди. Ҳамкорликда ишлаш керак-ку», — дейди Саъдулла Бобоқулов.
Ғузор туманлараро суди раиси Саттор Ақанов билан боғланишга ҳаракат қилдик. Аммо судья билан мулоқот қилиш имкони бўлмади.
Таъкидлаш лозим, Конституциянинг 106-моддасида суд ҳокимияти қонун чиқарувчи ва ижро этувчи ҳокимиятлардан, сиёсий партиялардан, бошқа жамоат бирлашмаларидан мустақил ҳолда иш юритиши белгиланган. Шунингдек, 112-моддада судьялар мустақил эканлиги, фақат қонунга бўйсуниши таъкидланган.
Конституциянинг 99-моддаси ҳокимлар тўғридан-тўғри туман кенгаши раиси эканлигини тасдиқлаб қўяди. Унда «вилоятлар, туманлар ва шаҳарларда (туманга бўйсунадиган шаҳарлардан ташқари) ҳокимлар бошчилик қиладиган халқ депутатлари кенгашлари ҳокимиятнинг вакиллик органлари бўлиб, улар давлат ва фуқароларнинг манфаатларини кўзлаб ўз ваколатларига тааллуқли масалаларни ҳал этадилар», дейилади. Шу сабаб ҳам Ғузор ҳокими суҳбат аввалида туман кенгаши раиси эканлигига алоҳида тўхталяпти.
Президент Шавкат Мирзиёев 2018 йилнинг декабрь ойида Қашқадарё вилояти фаоллари билан бўлган учрашувда ҳокимларнинг кенгаш раиси бўлишига тўхталиб, «Бир раҳбар одам ҳам ҳоким, ҳам кенгаш раиси бўлолмайди. Керак бўлса, ҳоким кенгашга ҳисобот беради», деган эди. Шунингдек, давлат раҳбари 2018 йилнинг 28 декабрь куни парламентга қилган Мурожаатномасида ҳам ҳокимнинг маҳаллий кенгашларга раислик қилиш амалиётига тўхталиб, «Ҳоким ҳокимлигини қилсин, лекин кенгаш олдида ҳисобот берсин», деб таъкидлаган.
