Хитойдаги фабрика ва заводларда иш тўхтагани, автомобиллардан атмосферага чиқаётган чиқиндиларнинг камайганлиги коронавирус тарқалишининг ижобий жиҳатларидан бирига айланди. Бу ҳақда Америка космик агентлиги (NASA) маълумот берган.
Мутахассислар 2019 йил декабрь ойида Ухань шаҳрида коронавируснинг тарқала бошлаши оқибатида ҳукумат шаҳарни ёпишга мажбур бўлгани, оқибатда маҳаллий корхоналар иши тўхтагани ва транспорт қатновлари ҳам чеклаб қўйилганига эътибор қаратган. Ушбу чора-тадбирлар коронавирус келтириб чиқарадиган пневмониянинг мамлакат бўйлаб кенг тарқалишига тўсқинлик қилиш мақсадида амалга оширилган.
NASA гарчи корхоналарнинг ёпилиши ва транспорт қатновларининг чеклаб қўйилиши мамлакат иқтисодиётига жиддий зарар келтирган бўлса ҳам, Ухандаги экологик вазиятнинг анча яхшиланишига сабаб бўлганини маълум қилган.
«Биз катта ҳудудда атмосферага чиқаётган чиқиндиларнинг битта фактор туфайли бу даражада жиддий камайганининг гувоҳи бўлдик», — дейилади NASA баёнотида.
Агентликнинг қўшимча қилишича, дастлаб чиқиндиларнинг камайиши Уханда кўзга ташланган бўлса, кейинчалик Хитойнинг бошқа ҳудудларида ҳам турли чекловлар туфайли экологик вазият анча яхшиланган. NASA лабораторияси берган маълумотга кўра, 2020 йилнинг ортда қолган даврида Хитойнинг марказий ва шарқий ҳудудларида атмосферага чиқинди чиқариш ўтган йилнинг мос даврига нисбатан 10—30 фоизга камайган.
Тадқиқотчилар иқтисодий муаммоларнинг дунёдаги экологик вазиятга таъсири биринчи бор кузатилмаётганини қайд этди. Шунга ўхшаш жараёнлар 2008 йилда жаҳон иқтисодий инқирози вақтида кузатилган. Бироқ у даврда коронавирус билан боғлиқ ушбу ҳолатдан фарқли ўлароқ атмосферани заҳарлаш жараёни тадрижий равишда камайган, бу қадар тезкор натижа кузатилмаган.
Изоҳ (0)