Bloomberg Billionaires Index reytingiga kiruvchi dunyoning 500 nafar eng boy kishisi 24-fevral, dushanba kuni, 139 milliard dollar yo‘qotdi. Meduza’ning yozishicha, bunga koronavirusning jahon iqtisodiyotiga salbiy ta’siri haqidagi yangi xavotirlar tufayli fond bozorlarining pasayishi sabab bo‘lgan.
Qayd etilishicha, bu Bloomberg Billionaires Index tomonidan tuzish boshlangan reytingda 2016-yilning oktabr oyidan buyon dunyodagi eng boy odamlar boyligining birinchi marta jiddiy pasayishidir.
Ular orasida eng katta zararni Bloomberg Billionaires Index’da birinchi o‘rinda turuvchi Amazon asoschisi Jeff Bezos va LVMH lyuks brendi egasi Bernar Arno ko‘rgan. Ularning ikkovi ham 4,8 milliard dollardan yo‘qotgan.
24-fevral kuni London fond birjasi indeksi FTSE 100 3,3 foizga, Germaniyaning Dax fond birjasi 4 foizga, Italiyaning FTSE Mib birjasi 4,5 foizga, Fransiyaning CAC 40 birjasi esa 5 foizga tushgan.
Amerikaning S&P 500 fond indeksi va Dow Jones sanoat indeksi 3 foizdan ortiq yo‘qotgan, Gonkongning Hang Seng fond birjasi 1,79 foizga, Yaponiyaning Nikkei fond birjasi esa 0,39 foizga tushgan.
Qayd etilishicha, fond birjalari koronavirus infeksiyasining Xitoydan tashqariga, xususan, Italiya, Janubiy Koreya va Eronga tarqalishi sababli tushib ketgan.
25-fevral holatiga ko‘ra, dunyoda koronavirusga chalinganlar soni 80 ming kishidan oshib ketdi, vafot etganlar soni esa 2 700 kishini tashkil qilmoqda.
Avvalroq milliarder Uorren Baffett koronavirusning tarqalishi va uning jahon bozoriga ta’siri haqida fikr bildirgan edi.
Izoh (0)