Омонулло Насриддинхўжаев янги тайинланган молия вазири Тимур Ишметовнинг биринчи ўринбосари этиб тайинланди. Бу ҳақда ҳукуматдаги ўз манбасига асосланиб, «Gazeta.uz» хабар бермоқда.

Омонулло Насриддинхўжаев.

Фото: «Gazeta.uz»

Насриддинхўжаев ушбу тайинловга қадар Президентнинг иқтисодиёт соҳаларини ривожлантириш, инвестиция ва ташқи савдо сиёсатини амалга ошириш масалалари бўйича маслаҳатчиси ўринбосари лавозимида ишлаб келаётган эди.

У 1994 йилда Тошкент давлат университети (ҳозирги ЎзМУ)ни, 2002 йилда Италиядаги Боккони университети бошқарув мактаби, 2016 йилда Harvard ишбилармонлик мактабини тамомлаган.

Турли йилларда Марказий Осиёдаги Жаҳон банки ваколатхонасининг халқаро таҳлилий бошқармасида (1994—1995), Credit Suisse’нинг Ўзбекистондаги ваколатхонаси раҳбарининг ўринбосари (1995—1998), Ўзбекистондаги Credit Suisse First Boston ваколатхонаси раҳбари (1998−2000) лавозимларида ишлаган.

Ўзбекистондаги БМТ Тараққиёт дастурининг қатор лойиҳаларини бошқарган Насриддинхўжаев 2005—2006 йилларда Халқаро молия корпорациясида молия масалалари бўйича маслаҳатчи, шунингдек, ташкилот доирасида Марказий Осиёда ипотека кредитини ривожлантириш лойиҳаси раҳбари ўринбосари лавозимида меҳнат қилган.

У 2007—2010 йилларда миллиардер Алишер Усмонов бошқарувидаги «Южно-Уральская горно-перерабативаюшчая компания» (USM Holdings таркибига киради)да ишлаган. Кейинчалик «Металлоинвест» (USM Holdings таркибига киради) директори ўринбосари бўлган. 2011—2016 йилларда Насриддинхўжаев «Байкальская горная компания» (USM Holdings таркибига киради)да раис ўринбосари, 2016 йилдан молия ва иқтисодиёт масалалари бўйича бош директори бўлган.