Президент Шавкат Мирзиёев 24 февраль, душанба куни, кимё саноатини ислоҳ қилиш бўйича истиқболли режалар ҳамда 2020 йилда амалга ошириладиган асосий вазифалар муҳокамасига бағишланган йиғилиш ўтказди, дея хабар бермоқда давлат раҳбарининг матбуот хизмати.
2020 йил Ўзбекистонда Илм, маърифат ва рақамли иқтисодиётни ривожлантириш йили деб эълон қилиниб, ҳар йили илм-фаннинг бир нечта устувор йўналишини ривожлантириш белгилаб олинди. «Тараққиётимизнинг ҳозирги босқичидаги муҳим йўналишлардан бири эса кимё соҳасидир», — дейилади Президент матбуот хизмати ахборотида.
Шу боис йиғилишда ушбу тармоқда таълим ва илм-фанни такомиллаштириш, замонавий кадрлар тайёрлаш жуда муҳимлиги таъкидланди. «Илм-фан ва ишлаб чиқариш ўртасидаги алоқани мустаҳкамлаш, бунинг учун тадқиқотларнинг соҳа корхоналари эҳтиёжига ҳамоҳанглигини таъминлаш зарурлиги кўрсатиб ўтилди», — дейилади хабарда.
Қайд этилишича, Президент йиғилишда Жанубий Корея билан ҳамкорликда илмий-тадқиқот институти (ИТИ) ташкил этиш, Тошкент кимё технология институтида мутахассисликлар ва ўқув дастурларини такомиллаштириш бўйича кўрсатмалар берган.
