Diamond Princess круиз кемасидан 24 февраль куни Буюк Британияга эвакуация қилинган 32 кишининг тўрттасида коронавирус борлиги аниқланди, мамлакатда касаллик юқтирганлар сони эса 13 кишига етди.

Фото: Reuters

«РИА Новости»нинг хабар беришича, бу ҳақда 23 февраль куни Буюк Британиянинг бош санитар шифокори Крис Уитти маълум қилган. Унинг таъкидлашича, касалланганлар махсус юқумли касалликлар марказига жойлаштирилган.

Diamond Princess круиз кемаси Япониянинг Йокогама портида 4 февралдан бери карантинда турибди. Кемада вирус тарқалаётгани 1 февраль куни Гонконгда тушиб қолган 80 ёшлик йўловчида янги турдаги вирус аниқланганидан сўнг маълум бўлган эди. Кемада жами 3,7 минг киши бўлган, уларнинг 600 нафарига коронавирус ташхиси қўйилган.

19 февраль куни кемадаги сайёҳларнинг дастлабки гуруҳига кемадан соҳилга тушишга рухсат берилди. Шу куни кемани тарк этган 500 нафар йўловчининг 300 дан ортиғи АҚШ фуқаролари эди. Лайнернинг барча соғлом йўловчиларини 21 февралга қадар эвакуация қилиш режалаштирилган эди.

Буюк Британия Diamond Princess’даги ўзининг ва Европанинг 32 нафар фуқароларини 22 февраль куни эвакуация қилган.

Соҳилга тушган йўловчилар орасида вирусни ташувчилар борлиги ҳақида аввалроқ Австралия ҳукумати маълум қилган эди. Таҳлиллар ушбу мамлакатнинг кемада бўлиб, сўнг ватанга қайтган икки фуқаросида коронавирус борлигини кўрсатган эди.

Мавзуга доир: Йўловчилар Diamond Princess саёҳат кемасидаги карантин ҳақида сўзлаб берди