Хитойда ўтган бир сутка давомида COVID-19 коронавируси оқибатида вафот этганлар сони 109 кишини ташкил этди. Бутун мамлакат бўйлаб вафот этганларнинг жами сони 2345 кишига етди, деб хабар беради Хитой Соғлиқни сақлаш миллий комиссияси.

Фото: Reuters

Идора маълумотларига кўра, яна 397 кишида коронавирус аниқланган, даволанишга муваффақ бўлган 2393 кишига шифохонадан жавоб берилган. Бутун мамлакат бўйлаб касалликни юқтириб олганлар осни 75 891 кишини ташкил этмоқда.

Коронавирус ўчоғи ҳисобланувчи Хубэй провинциясида касалликни юқтириб олган 366 нафар одам рўйхатга олинган, уларнинг 314 нафари — Ухань шаҳридан. Ўтган бир сутка давомида 106 киши айнан ушбу шаҳарда вафот этган.

Гонконг, Макао ва Тайванда жами 104 кишида касаллик аниқланган.

Аввалроқ Хитойнинг Сичуань провинциясидаги Чэнду шаҳрида COVID-2019 коронавирусидан тузалиб кетган беморнинг қайталаб қолгани ҳақида хабар берилганди. Жанубий Кореяда ҳам COVID-19 коронавирусига чалинган бемор вафот этган. 19 февраль куни Эрон ҳукумати вакиллари мамлакатда икки нафар одамнинг коронавирус оқибатида вафот этганини тасдиқлаган.