Фоторепортаж: Суриянинг Идлиб вилоятида нималар содир бўлмоқда?

Суриянинг Идлиб вилоятида навбатдаги зиддиятлар юзага келмоқда. Анқара Сурияда янги ҳарбий операцияларни ўтказиш билан таҳдид қилди. Туркия кўмаги остида бўлган жангарилар Сурия армияси позицияси томон юриш қилмоқда. «РБК» Идлибда содир бўлаётган воқеалардан фоторепортаж тайёрлаб тақдим этди.

Туркия ҳарбий кучлари Сурия шимолида ҳаракатланмоқда. Гувоҳлар ва журналистларнинг сўзларига кўра, 12 февралдан бошлаб Дамашқ назорати остида бўлмаган Туркия ва Сурия чегарасидан турк техникалари ўтмоқда.

Туркия томонидан қўллаб-қувватланувчи Сурия озодлик армияси бўлинмалари Идлиб вилоятидаги Сурия ҳукумат армиясига ҳужум уюштиришга тайёрланмоқда.

Россия ва Суриянинг таъкидлашича, АҚШ ҳамда Туркия Идлибдаги жангариларни қурол-яроғ билан таъминламоқда. Идлиб — қуролланган мухолифот томонидан назорат қилинувчи Суриядаги сўнгги йирик вилоят.

Сурия чегарасидан ўтаётган турк ҳарбий колонналари орасида танклар, зирҳли техникалар, снарядлар ортилган юк машиналари кўзга ташланган.

20 февраль куни Россия Мудофаа вазирлиги турк артиллерияси Сурия армиясининг позициясига зарбалар беришни бошлаганини маълум қилди. Россиялик ҳарбийлар алоқага чиққанидан сўнггина турклар ўт очишни тўхтатган.

Туркиянинг таъкидлашича, ўзларининг кўмаги остида бўлган кучлар томонидан амалга оширилган жанговар ҳаракатлар оқибатида 50 нафар Сурия ҳарбийси йўқ қилинган, Туркия армиясидан эса икки нафар ҳарбий ҳалок бўлган.

Россиянинг Су-24 қирувчиларидан иборат гуруҳ Сурия озодлик армияси бўлинмаларига зарба бериб, уларнинг ортга чекинишига сабаб бўлган.