Коронавирус тарқалишнинг олдини олиш мақсадида авиаташувчиларга қўйилган чекловлар туфайли 2020 йилда глобал йўловчи ташиш даражаси илгари тахмин қилинган ўсишга қарамай 0,6 фоизга камаяди. Бу ҳақда Ҳаво транспорти халқаро ассоциациянинг ҳисоботида сўз боради.
Тахминларга кўра, вирус сабаб жаҳон авиация трафиги 4,7 фоизга тушиб кетади. Бу эса жами йўловчилар оқимининг 2008 йили содир бўлган молиявий инқироздан бери кузатиладиган биринчи марта пасайиши бўлади. Ҳисоб-китобларга кўра, йўловчилар оқимининг камайиши оқибатида авиакомпаниялар 29,3 миллиард доллар йўқотади.
«Ёқилғи нархининг пасайиши, айрим молиявий йўқотишларни қоплаши мумкин. Бу авиакомпаниялар учун жуда оғир йил бўлади», — дейди IATA раҳбари Александр де Жюньяк.
Ассоциациянинг аниқлик киритишича, биринчи навбатда Осиё—Тинч океани минтақасида ишловчи авиакомпанияларда йўловчилар оқими 13 фоизга қисқаради, бу эса ўз навбатида 27,8 миллиард доллар зарар келтиради. Вирус оқибатида Хитой 12,8 миллиард доллар йўқотади. Минтақадан ташқарига учувчи самолётларга эга авиакомпаниялар 1,5 миллиард доллардан айрилади.
Бу каби ҳисоб-китоблар 2002-2003 йилларда тарқалган SARS вирусининг оқибатларига асосланган. Ўшанда вирус кўрсаткичларнинг кескин тушиб кетишига олиб келган, бироқ эпидемия тўхтатилгач, кўрсаткичлар ҳам тезда кўтарилганди.
Изоҳ (0)