Зоҳиршоҳ Жўраев Шабнам Сурайё нима учун «Халқлар дўстлиги»га киришни истамаганига ойдинлик киритди (видео)

Хонанда Зоҳиршоҳ Жўраев «Дарё» интернет-нашри учун эксклюзив интервью берди. Интервьюни журналист Феруз Муҳаммад ташкиллаштирди.

Зоҳиршоҳ Жўраев 2019 йилдаги «Яхши кўриб қолдим-да» деб номланган яккахон концерт дастурида тожик эстрадаси юлдузи Шабнам Сурайё билан дуэт куйлаган эди.

Хонанда Зоҳиршоҳ Жўраев суҳбат давомида Шабнам билан дуэти унга қанчага тушганлиги ва уни концерт саройига кириши билан боғлиқ муаммоли вазиятга ойдинлик киритди.

Шабнам Сурайё билан дуэтимизда ҳеч қандай харажатга тушмаганман. Қўшиқни ҳам ўзи таклиф қилган эди. У билан ўн икки йиллик дўстмиз, опа-укамиз. Мен концерт берсам у келишини, у концерт берса, мен боришимиз ҳақида ният қилганмиз. Форсий оламнинг энг зўр қўшиқчиларидан бири, раҳматли Аҳмад Зоирнинг қўшиғини айтдик. Бу қўшиғимиз форс оламида яхшигина оммалашди.

Зоҳиршоҳ Жўраев, хонанда

Хонанда Зоҳиршоҳ Жўраевнинг концерт вақтида дуэтдоши Шабнам Сурайё «Халқлар дўстлиги» саройига кирмайман, деб туриб олгани ҳақида хабарлар тарқалган эди. Зоҳиршоҳ Жўраев ушбу вазиятга қуйидагича муносабат билдирди.

Концерт дастурининг қонун-қоидасини яхши биласиз. Концертдан 2-3 кун олдин санъат саройининг орқа томонидан саройга кирадиганларнинг рўйхати берилади. Шабнам билан унинг ‘гримёр’и ҳам келган, аммо унинг номи рўйхатда бўлмаган. Ўшанда бироз тушунарсиз ҳолат бўлган. Ўзим концерт ташвишлари билан ичкарида юрганман. Шундай бўлганини эшитиб, чиққанимдан сўнг муаммо ҳал қилинган.

Зоҳиршоҳ Жўраев, хонанда

Маълумот учун, хонанда Зоҳиршоҳ Жўраев «Халқлар дўстлиги» саройида 24, 25 февраль кунлари  «Сени соғиниб» деб номланган концерт дастурини тақдим қилмоқда.