Эрон соғлиқни сақлаш вазирлиги вакили Киануш Жаҳонпур мамлакатда янги турдаги коронавирусга чалиниш ҳолатлари қайд этилгани ва у билан касалланган 2 нафар одамнинг вафот этганини маълум қилди, деб ёзмоқда «РИА Новости».
Фото: Al-Arabiy
Аввал Эронда коронавирус юқтирганликка гумон қилинаётганлар борлиги айтилган, бироқ расмийлар ушбу маълумотни тасдиқламаганди.
«Афсуски, ёши кексароқ бўлган икки бемор касалликдан вафот этди», – деб ёзган Жаҳонпур Twitter’да.
Шунингдек у ўз саҳифасида Эрон соғлиқни сақлаш вазири ўринбосари вирусга чалинганлар Эрон фуқаролари экани, улар бутун дунё шиалари зиёрат жойи ҳисобланган Кум шаҳридан бўлганини маълум қилган видеони жойлаштирган.
Эрон ҳукумати чоршанбанинг ўзида мамлакатда коронавирус касаллиги кузатилгани ва ундан икки нафар одамнинг вафот этганини хабар қилган. Бунгача форслар мамлакатда вирус сабаб қайд этилган ўлимлар ҳақидаги маълумотларга расмий муносабат билдирмай келаётганди.
Теҳрон коронавирус эпидемияси туфайли Хитой билан авиақатновлатни тўхтатган. Хитойдан келаётганлар эса карантинга жойлаштирилмоқда.
Хитой ҳукумати 2019 йилнинг 31 декабрида Жаҳон соғлиқни сақлаш ташкилотини Хубэй Провинциясининг маркази Ухань шаҳрида пневоминяни келтириб чиқарувчи номаълум вирус тарқалгани ҳақида хабардор этган. Мутахассислар касаллик қўзғатувчиси янги турдаги коронавирус эканини аниқлаган. ЖССТ коронавирусни халқаро даражадаги фавқулодда вазият деб топган ва касалликка – COVID-19 расмий номини берган. 2020 йил 19 февраль ҳолатига Хитойнинг материкли қисмида вирусни юқтириб олганлар сони 74,1 минг нафарни, ундан тузалганлар эса 14,4 минг нафарни ташкил қилади. Хитойдан ташқарида – 25 та мамлакатда COVID-2019 билан касалланиш бўйича жами 800 та ҳолат кузатилган, шундан учтасида – беморлар вафот этган.
