Германиядаги Ламберт нашриётида Самарқанд давлат университетининг профессори Муслиҳиддин Муҳиддиновнинг «‘Хамса’ларнинг илк достонларида комил инсон концепцияси» номли монографияси инглиз тилида нашр этилди. Бу ҳақда адабиётшунос олим Олимжон Давлатов «Дарё»га маълум қилди.

Олимжон Давлатовнинг маълум қилишича, адабиётшунос олим Муслиҳиддин Муҳиддинов фан тарихида биринчи марта «Ҳайрат ул-аброр» достонини монографик йўсинда тадқиқ этиб, Навоийнинг диний-тасаввуфий ва фалсафий-ахлоқий қарашларини илмий жиҳатдан холис ва ҳар томонлама асослаб берган.

Фото: «‘Хамса’ларнинг илк достонларида комил инсон концепцияси» номли монография

Мазкур монографияда Низомий Ганжавий, Амир Хусрав Деҳлавий, Абдураҳмон Жомий ҳамда Алишер Навоий «‘Хамса’ларидаги илк достонларида комил инсон тушунчасининг бадиий-фалсафий талқини ҳақида сўз юритилади.

Муаллиф хамсачиликдаги фалсафий-дидактик достонларда Шарқ мумтоз адабиётидаги комил инсон идеали ҳақидаги қарашларни қиёсий ўрганиб чиқиб, Алишер Навоийнинг фалсафий-ахлоқий қарашларининг ўзига хосликларини очиб беришга эришган.

Германиялик мутахассисларнинг таъкидлашича, Алишер Навоийнинг фалсафий-ахлоқий қарашларини ёритиб берувчи ушбу монография европалик мутахассисларни қизиқтириши шубҳасиз. Негаки, Алишер Навоий номи Европада анча машҳур бўлса-да, унинг ҳаёти ва ижоди ҳақида маълумотлар жуда кам. «‘Хамса’ларнинг илк достонларида комил инсон концепцияси» ана шу кемтикликни тўлдиришга хизмат қилади.

Маълумот учун, Муслиҳиддин Муҳиддинов 2016 йили «Ўзбекистон Республикасида хизмат кўрсатган ёшлар мураббийси» унвони билан тақдирланган.