Сўнгги бир суткада Хубэй провинциясида коронавирус оқибатида 100 киши вафот этди. Бу ҳақда Соғлиқни сақлаш минтақавий комиссиясининг маълумотларига таяниб, «РБК» хабар берди.

Фото: АП

Таъкидланишича, бу борада вазият 15 февраль кунига қараганда яхшиланган. Хитой ҳукумати 15 февраль куни 139 беморнинг ўлганини тан олганди.

Шу билан бирга маълум қилинишича, вирусни юқтириб олганлар сони ўтган кунга нисбатан 5 фоизга ошган (1933). Уларнинг 90 фоизи Ухань шаҳри ҳисобига тўғри келмоқда.

Хубэй провинциясида жами 58 182 нафар одамда коронавирус қайд этилган бўлиб, уларнинг 1696 нафари вафот этган. Провинциядан ташқарида жами 74 киши вафот этгани айтилмоқда. Шунингдек, Гонконг, Тайван, Франция, Япония ва Филиппинда ҳам беморлар вафот этган.

Куни кеча COVID-19 турига мансуб хавфли коронавирусдан энг кўп талафот кўрган Хубэй провинцияси ҳукумати шаҳар ва қишлоқларда яшовчи фуқароларнинг ҳаракатланиши учун транспорт хизматларидан фойдаланишни чеклаб қўйиш ҳақида қарор чиқарди.

Хитой ҳукумати берган маълумотларга кўра, 16 февраль ҳолатига кўра, мамлакатда коронавирусга чалинган беморлар сони 68,5 минг нафарга етган.