Қозоғистонда «зачётка»лар бекор қилинди

Қозоғистон олий таълим муассасаларида рўйхатга олиш дафтарчалари («зачётка») бекор қилинди. Бу ҳақда Tengrinews Қозоғистон Илм-фан ва таълим вазирлигига таяниб хабар берди.

Ушбу янгилик талабалар, магистрантлар ва докторантларга тааллуқли.

«Қозоғистондаги ОТМларда талабалар, магистрант ва докторантларнинг натижалари акс этадиган ахборот тизими жорий қилинмоқда, барча маълумотлар транскриптда акс этади. Транскрипт талаба сўрови асосида таълимнинг ҳар қандай даври учун берилади», — дейилади Қозоғистон Илм-фан ва таълим вазирлиги хабарида.

Ушбу қарор таълим муассасаларида бюрократик тўсиқлар ва ортиқча ҳужжатбозликларнинг қисқартирилишига сабаб бўлиши мумкин.

«Таълим тизими босқичма босқич онлайн-форматга ўтмоқда», — дейилган хабарда.