Японияда карантинга олинган Diamond Princess саёҳат кемасидаги коронавирусни юқтирган йўловчилар сони 44 нафарга кўпайиб, 218 кишига етди. Бу ҳақда «РИА Новости» хабар берди.
Мамлакат ҳукумати карантин муддати тугагунга қадар кемадан кекса йўловчиларни эвакуация қилиш ҳақида қарор қабул қилди.
Қайд этилишича, коронавирусни юқтирганларнинг 43 нафари йўловчилар, бир нафари эса экипаж аъзоси. Умумий ҳисобда кемада бўлган 218 кишида коронавирус аниқланган.
Кемада жорий этилган карантин 19 февраль куни якунланади.
Diamond Princess саёҳат кемаси жорий йилнинг 20 январь куни Йокогамадан чиқиб, Кагосима—Гонконг—Окинава йўналишидан ўтиб, 3 февраль, душанба куни, қайтиб келган. Бу вақтга келиб кемадаги бир неча киши тоби қочгани ҳақида хабар қилган ва ҳукумат бортдаги барчани текширувдан ўтказишга қарор қилган.
11 февраль куни саёҳат кемасидаги кексалар ва сурункали касалликларга эга беморларни соҳилга эвакуация қилишни бошлаган эди.
Аввалроқ кемадаги коронавирусни юқтирганлар сони 174 кишига етгани ҳақида хабар берилган эди.
Изоҳ (0)