Тошкент шаҳар божхона тизимида 10 нафар раҳбар ходим ишдан олинди

Давлат божхона қўмитаси Раиси Муроджон Азимов 12 февраль куни Тошкент шаҳар божхона бошқармасида навбатдан ташқари йиғилиш ўтказди. Қўмита матбуот хизмати ходими Ҳусан Тангриевнинг маълум қилишича, танқидий руҳда бўлиб ўтган йиғилишда ташкилий масалалар кўрилди.

Қайд этилишича, Тошкент шаҳар божхона бошқармаси бошлиғининг биринчи ўринбосари, 2 нафар ўринбосари, бошқарманинг 4 нафар бўлим бошлиғи, 2 нафар божхона пости бошлиқлари, «Арк-булоқ» божхона пости бошлиғи ўринбосари эгаллаб турган лавозимидан озод қилинди.

Бу хабарни «Дарё»нинг Давлат божхона қўмитасидаги манбалари ҳам тасдиқлади.

Шунингдек, Тошкент шаҳар божхона бошқармаси бошлиғининг янгиланган таркибдаги ўринбосарлари жамоага таништирилган.

Жумладан, Б.Муратов Тошкент шаҳар божхона бошқармаси бошлиғининг биринчи ўринбосари этиб, Н.Салимжонов ва Н.Усмонов бошқарма бошлиғи ўринбосарлари этиб тайинланди.

Бошқарма бўлимларига ҳам бошлиқлар тайинланган.