Қорақалпоғистоннинг Беруний туманида Matiz ва MAN юк машинаси иштирокидаги ЙТҲда 4 киши ҳалок бўлди. ИИВ матбуот хизматининг хабар беришича, воқеа 12 февраль соат 11:30 ларда содир бўлган.
1984 йилда туғилган А.Б. ўзининг Matiz’ини «Абай» ОФЙ ҳудудидан ўтувчи Ғузор—Бухоро—Нукус—Бейнеу А-380 йўлининг 645-километрида ҳайдаб кетаётиб, йўл сирпанчиқ бўлганлиги сабабли қарама-қарши йўналишга чиқиб кетган ва қаршисидан ҳаракатланиб келаётган 1987 йилда туғилган Ш.Т. бошқарувидаги MAN юк автомашинаси билан тўқнашган, юк автомашинаси йўл четига ағдарилиб кетган.
Оқибатда Matiz ҳайдовчиси А.Б., йўловчилари 1990 йилда туғилган. С.М., 2019 йилда туғилган М.Қ. ҳамда 1965 йилда туғилган Т.Р. воқеа жойида вафот этган.
Шунингдек, Matiz’нинг қолган йўловчилари 1989 йилда туғилган С.С., 2000 йилда туғилган Д.Қ. ҳамда MAN юк автомашинаси ҳайдовчиси Ш.Т. жароҳат олиб касалхонага ётқизилган.
Ҳолат юзасидан Беруний тумани ИИБ ҳузуридаги Тергов гуруҳи томонидан Жиноят кодексининг 266-моддаси 3-қисми (Транспорт воситалари ҳаракати ёки улардан фойдаланиш хавфсизлиги қоидаларини бузиш одамлар ўлимига сабаб бўлиши) билан жиноят иши қўзғатилган.
Аввалроқ Тошкентда электровоз ва Matiz иштирокида ЙТҲ юз бергани, Фарғонада юз берган ЙТҲ оқибатида Spark ёниб кетгани, Бухорода эса йўл чеккасига чиқиб кетиб, бир неча марта айланиб кетган Nexia’да 2 киши ҳалок бўлгани ҳақида хабар берилган эди.
Изоҳ (0)