Футбол бўйича Англия Премьер лигасининг 23-тури доирасида 18 январь, шанба куни навбатдаги 6 та ўйин бўлиб ўтди.
Микель Артета қўл остидаги Лондоннинг «Арсенал» клуби «Эмирейтс»да «Шеффилд Юнайтед»ни қабул қилди.
Беллашувнинг 45-дақиқасида «тўпчилар» вакили Габриэль Мартинелли ҳисобни очган бўлса, 83-дақиқага келиб меҳмон жамоа ярим ҳимоячиси Жон Флек ҳисобни тенглаштирди (1:1).
Натижада баҳс 1:1 ҳисобидаги дуранг натижа билан якунланди ва томонлар бир очкодан бўлишиб олди.
Қайд этиш жоиз, «Арсенал» 29 очко тўплаган ҳолда мусобақа жадвалида 10-ўринда бормоқда. «Шеффилд Юнайтед» эса 33 очко билан 7-поғонани эгаллаб турибди.
Шу куни Хосеп Гвардиола бошқарувидаги «Манчестер Сити» эса ўз майдонида «Кристал Пэлас» билан баҳсга киришди.
Учрашув давомида меҳмон жамоа аъзоси Женк Тосун (39) ўз ҳисобига битта гол ёздириб қўйган бўлса, «шаҳарликлар»дан аргентиналик ҳужумчи Серхио Агуэро (82, 87) дубль қайд этди. Сўнгги дақиқаларда эса «манкунианлар» ярим ҳимоячиси Фернандиньо (90) автогол муаллифига айланди.
Шу тариқа «Сити» ўз уйида кечган баҳсда «Кристал Пэлас» билан 2:2 ҳисобида дуранг ўйнади ва бир очкога эга бўлди.
Маълумот учун, «Манчестер Сити» 48 очко йиғиб, мусобақа жадвалида 2-ўринни банд қилиб турибди.
«Кристал Пэлас» эса 30 очко билан 9-ўриндан жой олди.
АПЛ
23-тур баҳслари
18 январь, шанба
Изоҳ (0)