Ижтимоий тармоқларда прокуратура органи ходимлари оммавий тарзда «Ҳуқуқ» ва «Халқ сўзи» газеталарига мажбурий обуна қилинаётгани ҳақида хабарлар тарқалди. Бош прокуратура ҳузуридаги Мажбурий ижро бюроси матбуот котиби Фарруҳ Тошпўлатов ушбу хабарлар юзасидан изоҳ берди, деб ёзади «Xabar.uz».
Ҳар бир прокуратура органлари ходимлари ўз фаолиятининг тарғиботчиси бўлган Бош прокуратура муассислигидаги ‘Ҳуқуқ’ газетасининг ўқувчиси ҳисобланади. Мазкур нашр жамиятимизнинг ижтимоий-сиёсий ҳаётидаги янгиликлар, қонунчиликдаги ўзгаришлар, соҳа фаолиятида қабул қилинаётган норматив ҳуқуқий ҳужжатлар мазмуни, тизимда оширилаётган ишлар ҳамда бошқа янгиликлардан хабардор қилиб турувчи асосий газеталардан бири ҳисобланди.Ўз навбатида, ‘Халқ сўзи’ ва ‘Народное слова’ газеталари ҳам ижтимоий-сиёсий ва қонунчиликдаги янгиликлар, юртимизда ҳаёти ва жаҳонда содир бўлаётган янгиликлардан биринчилардан бўлиб кунлик ахборот етказувчи матбуот нашридир.
Прокуратура, жумладан, Мажбурий ижро бюроси органлари томонидан ходимларнинг ушбу нашрларга уюшқоқлик билан, аммо ихтиёрий равишда обуна бўлиши юзасидан тегишли кўрсатма берилгани бор гап. Бироқ кўрсатмада асосий эътибор аҳоли ва истеъмолчилар билан кунлик мулоқотда бўлиш жараёнида, жамият ҳаётидаги янгиликлар ва қонунчиликдаги ўзгаришлардан хабардор бўлиши ҳамда ҳуқуқий билимларини янада мустаҳкамлашга қаратилган. Обунани ташкил этишда мавжуд ходимлар сони эмас, балки эҳтиёж инобатга олинган.
Ходимларнинг эҳтиёжи ва хоҳишига қараб 1 та газета нашрига йиллик, ярим йиллик ва ойлик обуна бўлиши ёки 2-3 нафар ходимнинг 1 та газета нашрига обуна бўлиши учун ҳам имконият яратилган.
Ташкил этиш ишларида мажбурий ёки бошқача тарзда обуна бўлиш ҳолларига йўл қўйилмаган.
Фарруҳ Тошпўлатов, Бош прокуратура ҳузуридаги Мажбурий ижро бюроси матбуот котиби
Изоҳ (0)