«Боланинг боши панжарага тиқилиб қолганди». 5-қаватдан тушиб кетган бола воқеаси тафсилотлари

Тошкентнинг Олмазор туманида 14 январь, сешанба куни соат 16:00 атрофида 3-Беруний даҳасидаги беш қаватли уйнинг бешинчи қаватида уч ёш 11 ойлик бола осилиб қолгани ҳақидаги видеохабар ижтимоий тармоқларда шов-шувга айланди. «Дарё» мухбири Мусулмонбек Иброҳимов воқеа жойида бўлиб, болакайни қутқариб қолган маҳалладошлар билан суҳбатлашди.

«Ҳаммаёқ ғала-ғовур бўлиб кетди. Тинчликмикан, дея сўрасак, қўшнининг боласи тепада осилиб қолибди, дейишди», — дейди қўшни хонадон эгаси Маъмуржон Ибрагимов. Хабарни эшитганларнинг бари ташқарига отилиб чиққан. Бола бўйнидан панжарада осилиб қолган, шунга қарамай унинг ўзи ҳам чиқиб кетишга ҳаракат қилиб, тепага талпинган.

«Пастда адёлни икки қават қилиб, ушлаб турдик. Қўшнилар уй эшигини очиб, ичкарига киришга ва қутқариб қолишга улгуришмади. Унгача бола пастга қулади ва Аллоҳнинг каромати билан, адёлга тушди. Кейин уни уйга олиб кириб, лат еган жойларини кўздан кечирдик. Бироздан сўнг тез ёрдам етиб келди», — деди Маъмуржон ака.

Маҳалла фаолларидан бири Рихсивой Султоновнинг сўзларига кўра, боланинг бешинчи қаватда осилиб турганини қўшни маҳаллада яшовчи Улуғбек ака исмли киши кўриб қолиб, ҳаммани ёрдамга чақирган.

«Биз ҳам ташқарига югурдик. Келиним уйдан олиб чиққан адёлни тутиб турдик. Шокка тушиб қолгандик, ҳамманинг хаёли болада эди. Тепада бола бечора йиғлаб, додлаяпти, буёқда аёллар қичқиряпти, одамнинг юраги тошиб кетяпти. Қарасам, бола пастга тушмаяпти, унинг калласи қисилиб қолган экан. Югуриб тепага чиқсам, қўшнилар — Зафар ака, Улуғбек ака ва ўғлим эшикни очишга ҳаракат қилишаётганди», — дейди Рихсивой ака.

«Улар эшикни очаман деб, жон-жаҳди билан уриб, болтани ҳам синдириб қўйишибди. Ўғлим дарров ертўладан монтировка ва ломни олиб чиқди. Эшикни очишимиз билан ўғлим дераза томон югурди ва: «Бола тушиб кетди, улгурмадим», деди. Ўша пайт қотиб қолдим; боши панжарадан ўтиб, чарчаб қолгани учун, қўлини қўйиб юборган экан», — дейди Рихсивой ака.

У қолганлар билан бирга шок ҳолатида пастга тушганида, бола Маъмуржон аканинг қўлида бўлган.

«Қўшнилар билан бирга болакайни уйига олиб чиқдик. Бола чарчаган шекилли, ухлаб қолди. Бироздан сўнг ИИБ ходимлари, кейин шифокорлар келди, болани юргиздириб кўришди. Бола қўли оғриётганини айтди. Онаси келгач, болани шифохонага олиб бориб, рентген қилдириб қайтишди. Касалхонадан келганидан кейин болани кўрдик, аҳволи яхши», — деди Рихсивой ака.

Воқеа юз берган вақтда бола уйда бир ўзи бўлган, онаси эса 1-синфда ўқийдиган қизини мактабдан олиб қайтиш учун чиқиб кетган бўлган.

«Бола ўзи шамоллаган экан, онаси совуқда болани олиб юрмай деб, катта қизини мактабдан олиб келиш учун кетган экан. Бола уйда ухлаб қолган. Турганидан кейин ойнани очган. Бу ҳам бир фалокат-да. Аллоҳ сақлагани шу бўлдики, бола озгина осилиб турди. У ҳам чайир экан, тепага қараб анча тирмашиб, талпинди», — деди Рихсивой Султонов.

Воқеа гувоҳларининг сўзларига кўра, болани тўртинчи қаватдан туриб тутиб қолиш имкони деярли йўқ эди.

«Тўртинчи қаватга чиққанимизда ҳам тутиб қололмасдик. Икки дераза орасида уч метр масофа бор — қандай қилиб тутиб қоласиз? Бирор нарса билан ушлаб тутаман десангиз ҳам, бола қалтисроқ ҳаракат қилиб юборса, бошқачасига тушиб кетиши мумкин. Бола кичкина бўлгани учун бировнинг бўйи ҳам етмасди унга», — деди Рихсивой ака.

Олмазор тумани ИИО ФМБ 7-сонли ИИБ бўлими профилактика инспектори, майор Мирсаид Миркаримовнинг «Дарё» мухбирига маълум қилишича, бола осилиб қолгани ҳақидаги хабар соат тахминан 16:00 ларда келиб тушган.

«Айтилган манзилга борганимизда, уйнинг ётоқхонасидан ташқари томонга қараган деразанинг панжара қисмида чамаси 4—5 ёшли бола осилиб турганини кўрдик. Шундан сўнг шу ердаги фуқаролар ёрдамида уй эгаларига хабар берилди, бола адёл билан тутиб, қутқариб қолинди. Унга ҳеч қандай жиддий шикаст етмади. Фақат пастга қулаётганида 3-қават бўғоти (соябони)га қўли тегиб, шилинди, холос. Шифокордан унинг соғ-саломат эканлиги ҳақида маълумотнома олдик», — деди у.

Боланинг аҳволи яхши эканлигини уни отаси Ёқубжон ака ҳам тасдиқлади; унинг айтишича, бола ҳозир уйда, аҳволи яхши, «ўйнаб юрибди».

«Мен ишда бўлгандим, рафиқам катта қизимизни мактабдан олиб келгани кетганди. Фалокат экан, асосийси, ўғлим тирик қолибди. Деразага панжара қўйилган, қандай қилиб у ерга кириб қолганига ҳайронмиз. Ўғлимизнинг аҳволи яхши, ҳозир уйда. Шифокорлар кўриб текширишди, шилинган жойлари бор. Ёрдам қилганларнинг барига, қўни-қўшниларга катта раҳмат. Шифокорлар, фавқулодда ҳолат, ички ишлар органлари ходимларига миннатдорлик билдирамиз», — деди боланинг отаси.

«Ўрнимизда бошқа одамлар бўлганида ҳам шундай қилган бўларди... Илоҳим, болакайнинг умрини узоқ қилган бўлсин!», — дея қўшимча қилди «қутқарув операцияси»га бош-қош бўлган Маъмуржон ака.