Самарқандда бир йилда 41 нафар уйланмоқчи бўлган йигитда ОИВ инфекцияси аниқланди

Самарқандда 2019 йилда 41 нафар уйланмоқчи бўлган йигитда ОИВ инфекцияси аниқланди. Бу ҳақда вилоят хотин-қизлар қўмитаси томонидан ҳамкор ташкилотлар, кенг жамоатчилик вакиллари иштирокида ўтказилган йиғилишда айтилди, деб ёзади «Zarnew».

2018 йилда эса бу кўрсаткич Самарқанд вилоят бўйича 61 тани ташкил қилган. Никоҳдан аввалги тиббий кўрикда аниқланган мазкур ҳолатлардан сўнг томонлар тўйни тўхтатган.

Анжуманда вилоят ҳокими ўринбосари, хотин-қизлар қўмитаси раиси Гавҳар Алимова қонуний никоҳдан ўтмай, шаръий никоҳ билан турмушга чиқишга розилик бераётган хотин-қизларнинг кейинги ҳаётида муаммолар содир бўлаётганини таъкидлаб ўтди.

«Ўтган йили хотин-қизлар қўмитаси томонидан мингга яқин шаръий никоҳ билан яшаётган оилалар аниқланди, уларнинг аксариятида муаммолар бор. Айниқса, шаръий никоҳ билан уйлангач, аёлини арзимас сабаблар билан уйига ҳайдаб юбориш, оқибатда аёлларнинг фарзандлари билан кўчада қолиш ҳолатлари кўп. Бу ҳолатнинг олдини олиш учун аҳоли орасида тарғибот ишларини кучайтириш керак. Ўтган йили тегишли ҳужжати бўлмаса-да, никоҳ ўқиган икки нафар расман рўйхатдан ўтмаган муллалар қўмита томонидан прокуратура органларига топширилди», — деди Гавҳар Алимова.

«Шаръий никоҳнинг яна бир салбий оқибати, никоҳланувчиларнинг тиббий кўрикдан ўтмаслигидир. Масалан, ўтган йили никоҳланувчиларнинг тиббий кўрикдан ўтиши натижасида 41 нафарида ОИВ инфекцияси аниқланган. Агар тиббий кўрикдан ўтмаса, бу рақам 82 та бўларди. Натижада тўй қолдирилди. Бундан ташқари, бир қатор ижтимоий касалликлар аниқланиб, никоҳланувчиларга маълум қилинган. Тасаввур қилинг, агар қонуний никоҳдан ўтмай, шаръий никоҳ билан турмуш қурган ёшларда шундай, ижтимоий хавфли хасталиклар учраса, ўзи билиб, эҳтимол билмаган ҳолатда яна бир инсонни ушбу хасталикка дучор қилади. ФҲДЁ органлари орқали никоҳдан ўтаётган ёшлар эса албатта, тиббий кўрикдан ўтишга мажбур», — дейди вилоят соғлиқни сақлаш бошқармаси бошлиғи ўринбосари С.Мўминов.

Йиғилишда жойларда бу масалага жиддий эътибор қаратиш лозимлиги бўйича тегишли ташкилотларга вазифалар белгилаб берилди.