Сурхондарё вилоятининг Қумқўрғон туманидаги «Кўганли» маҳалласида яшовчи аҳолининг давлат идоралари-ю, масъул раҳбарларга бўлган ишончи сўнган. Боиси уларни йиллар давомида қийнаб келаётган муаммога мутасаддилар эътибор ҳам қаратмаган. Бу ҳақда «Дарё»га журналист Вазира Эгамбердиева маълум қилмоқда.
«Дарё»га мурожаат қилган аҳоли маҳалла ичкарисидаги йўлда ҳаракатланиш ноқулайлик туғдираётганидан, йўл тор ва нотекислигидан шикоят қилмоқда. Уларнинг айтишича, бир неча йиллардан буён мутасадди ташкилотларга хабар берилган бўлса ҳам ҳатто масъулларнинг ўзлари келиб ўрганса ҳам натижа йўқ.
Маҳалла аҳлининг муаммосини ўрганиш мақсадида манзил сари одимладик. Автомобильда ўйдим-чуқур йўллардан ҳаракатланишимизга тўғри келди. Ҳатто баъзи жойларда қарама-қарши томондан ҳаракатланаётган автомобилга йўл бериб сўнг манзилда давом этганимиз ҳам бор гап. Кўчанинг нотекислиги бир дард бўлса, йўлнинг торлиги иккинчи дард. Автомобильлар ҳаракатланганида пиёдалар, пиёдалар ҳаракатланганида эса автомобилларга ҳаракатланиш учун йўл қолмайдиган «Кўганли» маҳалласи шундай муаммолар гирдобида яшамоқда.
Маълум бўлишича, бундан 3 ой илгари кўчага қум-шағал тўкилган, аммо иш ўша ҳолатда қолиб кетган.
— Йўлимиз мана шундай—нотекис. Тўғриси, касб тақозоси билан бошқа туманларга кўп бораман, — дейди киракаш ҳайдовчи. — Йўлларига ҳавасим келади. Текис, равон. Кам вақт ва кам ёқилғи сарфлайсиз. Бизнинг йўллар-чи? Йўлнинг торлиги етмаганидек, бизни калака қилгандек кўчаларимизга қум тўкиб кетишди. Битта машина зўрға юради. Пиёдалар қандай юрсин?
— Ёмғирли кунларда кўчамиздан юриб бўлмайди, — дейди аҳоли вакилларидан бири Ойсоат Нормуродова. — Фарзандлар, набиралар мактабга кетганида юрак ҳовучлаб ўтирамиз. Эсон-омон бориб келсин деб.
Маҳаллада яшовчи Жамила Зоированинг айтишича, йўлнинг бундай аҳволи сабаб бемор учун чақирилган тез тиббий ёрдам ҳам ўз вақтида келолмайди.
— Яқинда бетоб онамга «тез ёрдам» чақирдик. «Олтинсой» туманида турадиган укам етиб келдики, тез ёрдам машинасидан дарак йўқ. 30 дақиқада ҳам келолмади. Мен шифокорларни айбламайман, негаки йўлларимиз бу даражада экан уларни айбласак хато бўлади. 10 йилдан буён йўлимизни таъмирлаб бериш учун мурожаат қилмаган ташкилотимиз қолмади. Ҳеч ким бизни тингламайди, — дея шикоят қилади Жамила Зоирова.
Маҳалла аҳлининг айтишича, мазкур масала юзасидан Президент порталига ҳам мурожаат қилинган. Аммо мурожаатчидан тушунтириш хати ёздириб олиниб, «масъулларга ишлар қилинди» деб ёлғон маълумот берилган.
— 2014—2015 йилларда мурожаатимиз юзасидан «қайсидир вазирликданмиз», деб икки-уч киши келиб аҳвол билан танишгандек бўлганди, — дейди аҳоли вакиллари. — Лекин шу бўйи жим бўлиб кетишди. 2017—2018 йилларда ҳам Президент порталига мурожаат билан чиқдик. Аммо натижа бўлмаяпти. Маҳалланинг ўртасидаги икки чақирим масофага тош тўкдими-йўқми, қолганини ҳам тез кунда тўғирлаб берамиз деб «йўл таъмирланди» деган мазмунда ёздириб кетишган. Портални ҳам тушунтириш хати билан ёпиб юборишган кўринади.
Маҳалла аҳлининг иқрорига кўра туманнинг айни кундаги раҳбарига бу ҳақда мурожаат қилинмаган.
— Тўғри туманимизнинг янги ҳокимига бу масала юзасидан на оғзаки ва на ёзма хабар берганимиз — дейди мурожаатчилар. — Аммо олдиниги туман ҳокимига бот-бот айтавериб, тинкамиз қуриган.
Шу маҳаллада яшовчи Фаҳриддин Авазовнинг шикоят қилишича, йўл белгилари ва пиёдалар ҳаракатланиши учун йўлакча йўқлиги сабаб кўчада ЙТҲлар сони ортган.
— Бир неча кун олдин икки ўқувчини автомобиль уриб юборди. Бу вазиятда ҳайдовчини ҳам, пиёдни ҳам айблай олмайсиз. Ҳаммаси йўлларнинг расволигидан, — дейди Фаҳриддин Авазов. — Бирорта масъул, бирорта мард йўқки шу муаммо билан озгина қизиқса. Телевидениедан ҳам келиб йўлларни тасвирга олиб кетишганди доимгидек натижа йўқ.
Маҳаллада яшовчи аҳолининг айтишига қараганда йўлнинг ёмонлиги сабаб кира қилувчилар ҳам бу маҳаллага келишмас экан.
— Бирор жойга борсангиз маҳаллага келадиган автомобиль тополмайсиз, — дейди Муқаддас Зоирова. — Бир-иккита киракашлар бўлиши мумкин. Улар ҳам анчагина эскириб қолган машиналарда бўлишади. Эски эканлиги-ку майли, битта машинага бир кишилик олди ўриндиққа уч киши, орқа ўриндиқда эса 5 киши чиқишга мажбур бўламиз. Машина йўқлигидан мажбуран рози бўлишади шунга ҳам. Тунов куни мен ҳам маҳаллага қайтишим керак эди. Олд ўриндиққа ҳеч кимни олманг, пулини бераман, деб келишган эдим. Бир ҳомиладор келинчак келиб қолди. Орқада фақат эркаклар, аёл мажбурликдан орқа ўрнидиққа бешинчи йўловчи бўлиб ўтиришга мажбур бўлди. Раҳмим келди, рости. Икки кишининг пулини ҳайдовчига бердим-да, ўз ўрнимни ҳомиладор аёлга бўшатдим.
Ҳолатни ўрганиб ортга қайтар эканмиз, аҳолининг ташкилот раҳбарларига, муаммони ечувчи мутасаддиларга ишончи қолмагани яққол сезилиб турарди.
— Бари бефойда. Шунча мурожаатлар натижа бермаганда бунисидан наф чиқармиди? Телевидениеданмиз деб келишди, вазирликданмиз деб келишди. Аммо натижа чиқмади-ку, — дейди Бекзод Эшқобилов.
Кузатамиз, бу сафар масъуллар нима дейишар экан?
Изоҳ (0)