3-yanvar, juma kuni soat taxminan 9:30 atrofida Samarqand shahridagi Rudakiy ko‘chasida “Polvon Ariq” MChJga qarashli avtobus chuqurlikka tushib ketdi.
Transport vazirligi Samarqand viloyat boshqarmasi axborot xizmatining “Daryo”ga ma’lum qilishicha, Malik Asmanov boshqaruvida bo‘lgan avtobus 2-yanvar, payshanba kuni yoqqan yomg‘ir natijasida Rudakiy ko‘chasida kovlangan qismida botib qolgan. Oqibatda yo‘lovchilardan birining avtobusda qo‘li qayrilib, shifoxonaga olib borilgan. Avtobus maxsus texnika yordamida chuqurlikdan chiqarib olingan.
“Daryo” muxbiri Farhod Norbo‘tayevning xabar berishicha, gaz, suv va elektr ta’minotini yaxshilash maqsadida Samarqand shahridagi qazilgan ayrim ko‘chalarning chuqurlari to‘ldirilgan bo‘lsada, 2-yanvar kuni yoqqan yomg‘ir natijasida ularning aksariyati ko‘chgan.
Samarqand shahar hokimligi axborot xizmatining ta’kidlashicha, yomg‘ir natijasida yuzaga kelgan ayrim muammolarni bartaraf etish bo‘yicha joylarda ishlar olib borilmoqda.
“Rudakiy ko‘chasida ham qazish ishlarini olib borish va ko‘chani ta’mirlashda kamchiliklarga yo‘l qo‘yilgan va kuchli yomg‘ir oqibatida yo‘lning o‘sha qismida ko‘chish holati kelib chiqqan. Mazkur ko‘chani ta’mirlab bo‘lgunga qadar uni yopish bo‘yicha Samarqand shahar hokimi farmoyish qabul qildi”, — deydi Samarqand shahar hokimligi axborot xizmati rahbari Abdujabbor Po‘latov.
Ayni paytda Mintaqaviy yo‘llarga buyurtmachi injiniring kompaniyasi tomonidan Rudakiy ko‘chasining Beruniy ko‘chasidan Gagarin ko‘chasigacha bo‘lgan qismida rekonstruksiya ishlari boshlandi.
https://youtu.be/qCFJmT0Q-R0
Izoh (0)