Келесда Mercedes минган маст ҳайдовчи 1 январь тонгида йўл четида турган тенгдошини босиб кетди

1 январь куни соат тахминан 05:30 да, Тошкент вилоятининг Тошкент туманида шу туманда яшовчи, 1977 йилда туғилган А.З. исмли фуқаро Mercedes-Benz автомобилини маст ҳолда бошқараётиб, йўл четидаги пиёда, Тошкент туманида яшаган, 1977 йилда туғилган П.Д.ни уриб юбориб, йўл-транспорт ҳодисаси жойидан яширинган.

Натижада пиёда П.Д. воқеа жойида ҳалок бўлган. Кўрилган чоралар натижасида ҳайдовчи З.А. аниқланиб, 1 январнинг ўзида ушланган. Дастлабки маълумотларга кўра, ЙТҲ ҳайдовчининг спиртли ичимликдан маст ҳолда автомобиль бошқариши, қалин тумани тушганлиги сабабли пиёдани кўрмай қолиши оқибатида содир бўлган.

«Мазкур ҳолат бўйича Тошкент тумани ИИБ томонидан суриштирув ишлари олиб борилмоқда», — дейилади Йўл ҳаракати хавфсизлиги бош бошқармаси ахборотида.