Давлат хавфсизлик хизмати Фарғона вилояти бошқармаси ходимлари томонидан ўтказилган тезкор тадбир давомида Қирғизистон фуқароси М.А. Қува туманидаги деҳқон бозори ҳудудида 8,698 килограмм «гашиш» гиёҳвандлик моддаси билан ушланди. Бу ҳақда «Дарё»га ДХХ томонидан хабар берилди.
Аниқланишича, ушбу гиёҳвандлик моддаси Ўзбекистонга Қирғизистондан контрабанда йўли билан олиб кирилган.
Бошқа бир ҳолатда эса Водил—Фарғона йўналиши бўйлаб ҳаракатланиб келаётган Фарғона туманида яшовчи Т.Б. бошқарувидаги Tracker автомобили тўхтатилиб текширилганда, 504 грамм «гашиш» моддаси борлиги маълум бўлди.
Олиб борилган терговга қадар текширувлар давомида аниқланишича, Т.Б. ушбу моддани Қирғизистон Республикаси Боткен вилояти Қадамжой туманида яшовчи шахсдан 1500 долларга сотиб олган ва айланма йўллар орқали Фарғона туманига олиб кирган.
Хабар берилишича, бу каби гиёҳванд моддалар савдоси Андижонда ҳам фош этилган. ДХХ Андижон вилояти бошқармаси ходимлари томонидан ўтказилган тезкор тадбир давомида Асака туманида яшовчи, муқаддам судланган Й.С. ва унинг шериги Т.М. 802 грамм «гашиш» гиёҳвандлик моддаси билан қўлга олинган. Улар ушбу гиёҳванд моддани Марҳамат туманида яшовчи Ф.Ф.дан 9900 долларга сотиб олгани маълум бўлган.
Тезкор тадбир давом эттирилиб, ушбу ишга алоқадор бўлган Ф.Ф. ҳамда А.М. ҳам қўлга олинган. Ф.Ф.нинг ёнидан гиёҳванд модда савдосига тегишли бўлган 2600 доллар, А.М.нинг ёнидан эса 7300 доллар ашёвий далил сифатида олинган.
ДХХ Сирдарё вилояти бошқармаси ходимларининг Тошкент вилояти Бекобод шаҳрида ўтказган тезкор тадбири давомида муқаддам судланган фуқаролар Б.У. ва Э.Б. қўшни Тожикистондан олиб келинган 995 грамм «опий» гиёҳванд моддасини 8000 долларга сотаётган вақтида қўлга олинган. Шунингдек, дастлабки суриштирув ишлари вақтида Э.Б.нинг уйи кўздан кечирилганда, хонадон ҳовлисига 490 грамм «гашиш» моддаси кўмиб қўйилганлиги маълум бўлган.
Ўтказилган тадбирлар натижасида жами 10 килограмм 494 грамм «гашиш» ва 995 грамм «опий» гиёҳвандлик моддалари мусодара қилинган.
Ҳозирда аниқланган ҳолатлар юзасидан Жиноят кодексининг тегишли моддаларига асосан жиноят ишлари қўзғатилиб, тергов ҳаракатлари олиб борилмоқда.
Изоҳ (0)