Сурхондарёда аёллар сочини сотиб олиш баҳонасида вақтинча қаровсиз қолдирилган хонадонларга кириб, ўғрилик жиноятини содир этган жиноятчи гуруҳ қўлга олинди. Бу ҳақда «Дарё»га вилоят ИИБ ахборот хизмати хабар беряпти.
Хабарга кўра, маҳаллаларда қаровсиз қолдирилган хонадонларни тунашни касб қилиб олган ўғрилар гуруҳи 5 кишидан ташкил топган бўлиб, улар Наманган вилоятида истиқомат қилувчи фуқаролардан иборат бўлган. Гуруҳ аъзолари вилоят ИИБ ходимлари томонидан ўтказилган тадбирлар пайтида қўлга олинган.
Маълум бўлишича, жорий йилнинг 28 февраль куни, Қизириқ туманида яшовчи фуқаро Ғуломжон Шойимқулов туман ИИБ га мурожаат қилиб, номаълум шахслар унинг яшаш уйига ғайриқонуний тарзда девор орқали ўтиб, 3 миллион 900 минг сўм пуллари ва турмуш ўртоғига тегиши бир дона аёллар тилла занжири, бир жуфт бриллиант кўзли узук-сирғалар ҳамда уч дона тилла узукни яширин тарзда талон-тарож қилиб, воқеа жойидан яширинганлигини маълум қилган.
Мазкур ҳолат юзасидан Қизириқ туман ИИБ томонидан Ўзбекистон Республикаси Жиноят кодексининг 169-моддаси 2-қисми «Г» банди билан жиноят иши қўзғатилган.
ИИБ ходимлар томонидан олиб борилган тезкор суриштирув натижасида ушбу жиноят Наманган шаҳрида яшовчи, Жиноят кодексининг тегишли моддалари билан муқаддам бир неча маротаба судланган Н.Д. ҳамда унинг турмуш ўртоғи С.М., жиноий шериклари А.М., Ж.Р., муқаддам бир маротаба судланган фуқаро А.Э.дан ташкил топган жиноий гуруҳ томонидан содир этилганлиги аниқланган.
Ҳозирги кунда ушбу шахслар бошқа ўғирлик жиноятини содир этганлиги эҳтимоли мавжудлиги юзасидан суриштирув ва тергов ҳаракатлари олиб борилмоқда.
Изоҳ (0)