«Дарё» колумнисти Сарвар уста анъанавий рукнда ўтган ҳафтада муҳокама қилинган асосий ижтимоий масалаларга тўхталиб ўтади.
Президент – мамлакат етакчиси. Аниқроғи, у мамлакатни етаклаб келажак сари элтади. Шу нуқтаи назардан қарасак, унинг фикрлари, нутқларидан парча, қанотли иборалари жойларга ёзиб қўйилиши табиий ҳолдек кўринади. Тараққий этган давлатлар ҳам бундан истисно эмас. Шунақа-ку...
Шунақа дейсиз-у, истаган нарсасини ёзиб, остига президент исмини қўядиганларга нима дейсиз? Мақоланинг пешонасини ярқиратиш учун президентдан иқтибос келтиришларига кўникдик, аммо президент айтмаган гапни айтди, деб ёзиш камида ҳурматсизлик ҳисобланиши керак эмасми? Бўлмаса, эҳҳе, биласизми, нималар юз беришини?
Авваллари кўча-кўйда марҳум президент Ислом Каримовнинг иқтибосларига кўзимиз тушмаган жой йўқ эди. Энди Шавкат Мирзиёевнинг иқтибосларини тез-тез учратамиз. Қашқадарёнинг Почкамар сув омборига яқин жойда катта автотрасса четидаги плакатга «Тадбиркорнинг иши кўп, Қайда бўлса иши хўб», деб ёзиб, остига президент исм-шарифини қўйишибди. Ҳеч эслолмадим – президент бирор марта қофияли ибора айтганмиди?
Касби туманининг Қамаши ҚФЙга киришда эса президент номидан яна бир ғаройиб ибора ёзилибдики, ўқисангиз «бу ўзбек халқ мақоли эмасмиди?» дейсиз. Қамашиликлардан оригиналини кутиб қоламиз.
Энг қизиғига энди келдик. Термиз шаҳридаги бош шифохона деворига ёзилган фикрни ўқинг: «Тиббиёт ходимлари саломатлигимиз посбонларидир». Узр, бу гап ёзилмагунча тиббиёт ходимлари саломатлигимизга посбон эканлигини билмасмидик? Мана, бугун билиб олдик, биздан бахтли йўқ. Яна бу қадар содда, ҳамма биладиган гапни президентга нисбат берилгани нимаси?
Хўш, яна қандай ибораларни халққа едирмоқчи бу маҳаллий раҳбарлар? Ёзаверинг, «Ёз иссиқ, қиш совуқ бўлади, қишда печка қуриш керак, ёзда эса шарт эмас», деб ёзинг. «Мактабда болага билим берилади, шифохонада эса даволанади», деб ёзинг. «Ҳовузда сув бўлади, чўмилишга тушсангиз ҳўл бўласиз, кейин артинишни унутманг», деб ёзсак-чи? «Банкда пул бўлади, қассобхонада эса гўшт сотилади. Банкдан гўшт, қассобхонадан пул сўраш Ўзбекистон фуқаросига жоиз эмас», деб ёзилса қандай бўлади? Остига нима ёзишни яхши биласиз.
Озгина китоб ўқийлик, яхшилар. Ҳеч бўлмаса президент нутқи ва асарларидан нимани олишни ўрганайлик.
Сарвар уста
Муаллиф фикри таҳририят нуқтаи назаридан фарқ қилиши мумкин.
Изоҳ (0)