Kolumnistimiz Sarvar usta endi jahonshumul masalalarga ortiq aralashmasdan, gaz-elektr-ko‘mir kabi “xodovoy” mavzularda yozib yurmoqchi. Qish fasli borki, o‘zbeklar uchun o‘lmaydigan muammo haqida yozishga nima yetsin.

Kirib keldi oltin kuz, gaz-svetdan umid uz. Qishni bu yurt quvonch emas, tashvish bilan kutishga ko‘nikdi, ko‘niktirishdi. Gaz qazib chiqarish bo‘yicha dunyoda yetakchilar safida ekanimiz bugun istehzo uyg‘otuvchi iboraga aylandi. Bu holdan chiqishning chorasi bormi?

Kollaj: “Daryo”

Sovet rangli televizorlari tez-tez buzilib, yaxshi ko‘rsatmasdi. Latifalar to‘qilgan: “Dada, nega bizning televizorimiz ko‘rsatmaydi?”, “Chunki bizniki rangli-da”. Xo‘sh, nega o‘zbeklar gazga muhtoj? Chunki bizda gaz konlari ko‘p-da.

Ular xalqniki emasligi haqida indamaymiz, mayli. Xo‘sh, bizda gaz koni ko‘p ekan – bu yaxshi. Bu gaz kambag‘allarga berilmas ekan – bunisiga ham ko‘nikdik. Nima qilish mumkin? Javob oddiy – chetdan sotib olish. Qozog‘istonda suyultirilgan propan gazining litri 20 sent atrofida (ikki ming so‘m), bizda qariyb ikki baravar qimmat. Quvurdan keluvchi tabiiy gaz narxlari orasidagi farq ham taxminan shuncha. Qozog‘iston yoki Turkmanistondan quvur tortamiz. Kattakon sisternalarda suyultirilgan gaz sotib olamiz. Tadbirkorlar qotirib tashlaydi, davlat akamiz bojni oshirib qo‘ymasa bo‘ldi. Eng qizig‘i, gazi bo‘laturib qo‘shnisidan gaz sotib olib uyini isitgan noyob mamlakat sifatida nom tarqatamiz. Bug‘doy ekib, unni Qozog‘istondan import qilishda (o‘zimizniki molga) tajribamiz bor. Endi gaz importiga navbat. Rossiya ham cheksiz gazi bo‘laturib O‘zbekistondan gaz oladi. Ulardan kam joyimiz bormi?

Sog‘lomga kasalxona, bemorga mikrofon

Qiziq tendensiyani sezyapsizmi? Sog‘lomlar kasalxonada, sindromga uchraganlar esa yulduz.

Bir ayol ko‘chaga chiqib yurgandi. Bitta o‘zi emas, odamlar bilan birga. Onlayn translyatsiya qilgan, ayrimlarga yoqimsiz gaplar aytgan. Hozir jinnixonaga joylangan.

Kap-katta odam o‘zga sayyorada mehmon bo‘lib kelganini hikoya qilyapti. O‘zidan o‘zi tabib bo‘lib qolgani-yu, “uyoqda” qirqta farzandi borligini aytib qulog‘imizga tepyapti. Sog‘lom odam shunday deydimi? Ammo uning atrofida muxbirlar girdikapalak. Televizor-u saytlar undan bo‘shamaydi.

“Biz kutgandik, bilgandik” iboralari bilan mashhur ijodkorning qaytishi Andijonda bo‘ldi. “Andijonda tug‘ilishni orzu qilgan” qizaloqni ko‘plar tanqid qildi, ammo shifokor “Bu psixologiyada o‘rganilgan tibbiy sindrom” deya yordam berishga chaqirdi. Qiziq dunyo.

Odam yulduzlikni orzu qilishga ham qo‘rqadi.

Sarvar usta

Muallif fikri tahririyat nuqtai nazaridan farq qilishi mumkin.