“Daryo” kolumnisti an’anaviy ruknda o‘tgan haftada muhokama qilingan asosiy ijtimoiy masalalarga to‘xtalib o‘tadi.

O‘tgan hafta Samarqandda ulgurji miqdorda elektr quvvati o‘g‘irlanganini fosh qilgan MIB boshlig‘i ishdan olinibdi. MIB boshlig‘i tumandagi kattakon beton zavodi tok o‘marayotganiga qarshilik qilgan ekan.

Foto: “Kun.uz”

MIBchilarning aytishicha, zavod elektr tarmoqlari korxonasi bilan hech qanday shartnoma rasmiylashtirmagan, hech qanday hujjat taqdim qilolmagan, hech qanday elektr hisoblagich o‘rnatmasdan, elektr energiyadan to‘g‘ridan to‘g‘ri, noqonuniy foydalanib kelgan. O‘zingiz ham ko‘rgansiz: mahalladagi ba’zi olg‘irlar devor tirqishidan, quvur ichidan, to‘sin orqasidan yashirincha sim tortib, o‘g‘rincha bepul tok ishlatadilar. Samarqanddagi olg‘ir zavod bu o‘g‘rilikni san’at, yo‘g‘e, sanoat darajasiga ko‘tarib qo‘ygan.

Xullas, shuni fosh qilgan MIB boshlig‘ini ishdan optashlashibdi. Albatta, nega ishdan olinganini so‘rasangiz, “- Yo‘, yo‘-o‘, o‘z arizasiga ko‘ra ozod etildi, boshqa sabab yo‘q, salomatligi ko‘tarmayapti-da”, deb izohlashadi. Ammo bilgichlarning aytishicha, bu zavod hazilakam odamga qarashli emas. MIB boshlig‘ini olib tashlaganidanoq, xulosa qilavering. Darvoqe, MIBning plomba va muhrini hammaning ko‘z oldida namoyishkorona yulib tashlash uchun yurak ham, tanka ham otning kallasidan katta bo‘lishi kerak. O‘sha yerda turgan ichki ishlar xodimlari qonunbuzarga miq eta olmaganiga nima deysiz? Qonunga tupurish bo‘lsa, shunchalik bo‘lar.

Endi bu zavodni ko‘rganda MIBchilar o‘-o‘ deyishi aniq.

Endi bir gap. Jannatmakon yurtimizda qonundan ham ustun, daxlsiz va bekam-u ko‘st kishilar bor. Ular yaqinlashsa, ochilmaydigan eshiklar ochiladi, ishlamaydigan zavod ishlab ketadi. Motori yo‘q mashinaga chiqsa, mashina ham qo‘rqqanidan yurib ketsa kerak. Ular Nitshening oliy odami, sira xato qilmaydi, sutdek oq va aybsiz. Ular biror ish qilsa qonun teskari qarab turadi, teskari qarash tugul yo‘liga poyandoz bo‘lib oyoqlarini uqalab qo‘yadi. Siz ularni tanidingiz, zotan siz yashaydigan hududda ham qonundan ustun oliy zotlar topilishi aniq.

Nima qilmoq kerak? Bunday odamlarning ro‘yxatini tuzib, “tegib bo‘lmaslar” kategoriyasi ostida malakalash lozimki, to‘g‘ri ishlashga da’vogarlar ularning dumini bosib qo‘yib uchib ketmasin. Adolat degan narsadan qo‘lini yuvmasin. Haqiqat bor, qonunlar ishlayapti, deb o‘zini xursand qilib yuraversin. Bekor uvol bo‘lib ketgandan shunisi afzalroq-da.

Sarvar usta

Muallif fikri tahririyat nuqtai nazariga mos kelmasligi mumkin.