«Челси» янги дарвозабон сотиб олади. Буни шахсан Лэмпард хоҳламоқда

Лондоннинг «Челси» клуби 2020/21 йилги мавсумни янги дарвозабон билан бошлаш ниятида, деб ёзмоқда Bleacher Report.

Клубга яқин манбанинг таъкидлашича, янги дарвозабон олиб келинишини шахсан жамоа бош мураббийи Фрэнк Лэмпард хоҳламоқда. Боиси, Лэмпард жамоанинг айни дамдаги посбони Кепанинг клубдаги ўрнидан хурсанд эмас. Шу сабабдан, мураббий янги посбон хизматларига эҳтиёж сезмоқда.

Қайд этиш жоиз, Кепа Аррисабалага футбол тарихидаги энг қиммат дарвозабон ҳисобланади. «Челси» испаниялик учун 2018 йил ёзида Бильбаонинг «Атлетик» клубига 80 миллион евро тўлаган.

Эслатиб ўтамиз, Кепа ўтган мавсум «Челси»нинг ўша вақтдаги устози Маурицио Сарри билан ҳам тортишиб қолганди.