Тошкент шаҳрида «Оқлоқ» маҳалласи орқали янги қурилаётган кўп қаватли уйларга тоза ичимлик суви қувури асфальт йўлни бузмасдан тортилмоқда. Бу ҳақда пойтахт ҳокимлиги матбуот хизмати хабар берди.
Мазкур жараён махсус бурғулаш машинаси ёрдамида амалга оширилгани сабаб маҳалла аҳли ва йўл қопламасига зарар етказмайди. Белгиланган жойдан маълум бир қияликда ер остига кириб кетаётган мослама бир соатда 40 метргача бўлган масофани кавлайди. Шу орқали у қўл меҳнати орқали бажариладиган иш ҳажмини ўн баробарга қисқартиради.
Керакли манзилга бурғулаш йўли орқали етиб олган машина у ердан орқага қайтишда коммуникация қувурини тортиб келиб, уни ўрнатиб кетади. Қувурнинг диаметри 5—16 сантиметргача бўлиши мумкин.
«Ушбу ускуна август ойида Ўзбекистонга биринчи марта олиб келинган бўлиб, 7 метр чуқурликдан 200 метр узунликкача қувурларни торта олади. Бугунги кунда Тошкент шаҳрида тўртта йирик объектларда ичимлик суви ва газ қувурларини олиб ўтказдик. Кейинги йилда 16 километр узунликда ер ости қувурларини ўтказиш мўлжалланган», — дейди қурилиш компанияси иш юритувчиси Миродил Миршамилов.
Айни вақтда Тошкент шаҳрида бешта шу турдаги техника мавжуд.
Изоҳ (0)