Ўзбекистон Мудофаа вазирлиги ахборот ва оммавий коммуникациялар департаменти бошлиғи подполковник Баҳром Зулфиқоров раҳбарлигидаги ҳарбий делегация Хитойга хизмат сафарида бўлди. Бу ҳақда Мудофаа вазирлиги ахборот ва оммавий коммуникациялар департаменти «Дарё»га маълум қилди.
Сафардан кўзланган асосий мақсад дунёнинг ривожланган давлатидаги ҳарбий матбуот фаолиятини ўрганиш ва ўзаро тажриба алмашиш бўлди.
Сафар давомида делегация аъзолари Мудофаа вазирлиги халқаро ҳарбий ҳамкорлик канцелярияси бошлиғи генерал майор Ци Говей, мудофаа вазирининг матбуот котиби – вазирлик ахборот департаменти бошлиғи катта полковник У Цян билан учрашув ўтказди.
Хитой Мудофаа вазирлигида ўтган тадбирлар давомида икки мамлакат мудофаа идоралари орасидаги ҳарбий ҳамкорликнинг бугунги ҳолати, шунингдек, ахборот соҳасида амалга оширилаётган ишлар, уларнинг ўзига хос, ўхшаш ва фарқли жиҳатлари, медиа маҳсулотларини тайёрлаш жараёнлари ҳақида фикр алмашилди. Шунингдек, ахборот департаментлари ўртасида ҳамкорлик алоқаларини ўрнатишга оид истиқболли йўналишлар муҳокама қилинди.
Ўзбекистон ҳарбий делегацияси Хитой ҳарбий матбуоти фаолияти билан яхшироқ танишиш мақсадида Хитой Халқ-озодлик армияси оммавий ахборот воситалари марказининг телерадио эшиттиришлари бўлимида бўлди. Меҳмонларга марказнинг техник имкониятлари намойиш этилди.
Ўзбекистонлик ҳарбийлар Хитой Компартияси марказий қўмитасининг нашри ҳисобланувчи «Женмин жибао» газетаси таҳририятига ҳам таклиф этилди. Таҳририятнинг сиёсат бўлими бошлиғи ва ҳарбий-ватанпарварлик йўналишига ихтисослашган мухбирлар билан суҳбатда материалларни босма ва электрон кўринишдаги газетага чоп этиш жараёнлари ҳақидаги маълумотлар етказилди.
Хитой халқ университетининг журналистика факультетига ташриф эса ҳарбий матбуот соҳасида кадрлар тайёрлаш бўйича тажриба алмашиш учун муҳим аҳамият касб этди.
Изоҳ (0)